Player ṭha an lo kal kan beisei - Guy Forget

French Open tourna-ment director Guy Forget chuan inelna an buatsaih hunah season dang ang bawkin player ṭha an inlan theih a beisei, player langsar zingah inlan tuma sawi chiang erawh an la awm lo.

Roland Garros hi May thla a khelh tur kha ni mah se coronavirus vangin a hunah an khel thei lo. September thla chawhnu lamah clay court inelna lian hi neih an tum - a hmuna entu awm theih pawh an beisei hial. Guy Forget chuan, "ATP leh WTA chuan season kal laia Grand Slam pahnih hlawhtling taka khelh theih a nih nan hma an la a, hun chep tak karah inelna lian pahnih hi ṭha taka khelh a nih theih ngei nan ruahmanna pawh siam a ni.

"Player ṭhenkhat chuan hun inhnaih taka tournament khelh zawn chu an zo dawn lo , inhnukdawk leh inlan tum lo pawh an awm ngei ang. Harsatna hrang hrang thleng thei karah hian Paris khawpuiah player ṭha an rawn kal kan beisei," a ti. Tennis season kal laia major tournament khelh hmabak US Open leh French Open-ah hian Rafael Nadal chu nomawi kawl ve ve tu a ni a, Spanish star hian inelna neih hmabak hi inhnaihchilh a tih thu leh a awm dan tur a la tih chian loh thu a lo sawi tawh a ni.