Serena ngamtu Osaka kutah nomawi

Naomi Osaka chuan Serena Williams hnehin US Open champion a ni ta a, Japanese tennis player zingah Grand Slam nomawi chawi thei hmasa ber a ni nghal bawk.

Inrinni zan khan Flushing Meadows, New York-ah final khelh niin, Arthur Ashe Stadium chhungah darkar khat leh minute 19 chhungin kum 20 mi Osaka hian a naupan laia a 'idol' Serena lakah 6-2, 6-4 in hnehna a chang.

Kum 36 mi Serena-i'n court chhungah a nungchang mawi a hloh a, umpire Carlos Ramos a an khum. American tennis star hi point paih sak a nih hnuah pawh a insiamṭhat duh loh avangin game hial paih sak a ni a, tho chhuak thei a awm ta lo. US mipuiin an ṭan rawn Serena-i'n umpire a chibai duh lo a, a khingpui Osaka lakah erawh lawmpuina a lantir thung.

Hei le Osaka
US Open khelh ṭan a nih hma khan champion tura rinkai zingah Naomi Osaka hi a tel phak lem lo, seeded 20-na niin inelna lianah tawnhriat a la nei tlem hle bawk. Final-a a hneh tak Serena erawh nomawi chawi thei tura buk rit leh langsar berte zinga mi a ni phak thung.

Inelna an ṭan a, Osaka-i'n beisei phak bakin a khel. Match sarih a khelh chhungin set khat chiah a hloh, last 16-a Aryna Sabalenka nen an inkhelh bak chu set hloh miah loin a kaltluang thei. A tan final hi fiahna hautak ber tura ngaih a ni, chuti chung chuan Serena thinrim in hrosa vel karah pawh a chiai lo - huaisen taka ngamtu a ni.

World number 20 Osaka chuan, "Court chhung ka luh chiah khan Serena fan ka nih tawh ṭhinna ka dah bo a, tennis player ka nihna chiah ka hre tawh. Tun hi ka tan chuan ka hun tawn ropui ber a ni," tiin a sawi. Maria Sharapova (2006) hnua Osaka hi US Open champion thei naupang ber a ni.

Osaka chuan, "Mipui khan Serena an ṭan em em a, a vawi 24 nan Grand Slam nomawi chawi se tih kha an duh pui vek. Mahse, kei pawhin ka hun ṭha neih kha theihtawpin ka hmang ve bawk, inkhelh zawh hnua kan in kuah chiah kha chuan naupang ang maiin ka in ngai," tiin a naupan laia a inkhel a en ṭhin Serena chungchang a sawi.

Japan nula
Japanese nu Tamaki Osaka leh Haitian pa Leonard San Francois te inkarah Naomi Osaka hi Japan rama khawpui lian tak pakhat Osaka-ah 16 October 1997 khan a piang. A nu te hnam chin dan phung angin 'Osaka' tih chu hmingah an chhawm, a unaunu Mari Osaka pawh tennis khel thiam tho niin; doubles huangah an inlan dun ṭhin.

Osaka te hi kum thum mi chauh an nih laiin New York-ah an pem, chumi hnuah tuna an chhungkaw chenna Florida an pan leh. Ram pahnih - Japan leh US khua leh tui nihna nei Osaka hi a rualpui zingah tennis thiam fal nalh a ni a, mahse nomawi lian tham chawi erawh a awlsam bik lo. Season tir lam khan Indian Wells-ah WTA title hmasa ber a la, a dawt chiahah Miami Open khel lehin - inelnaah hian Serena Williams a hneh.

New York-ah hian tun hmain - Gabriela Sabatini (1990), Lindsay Davenport (1998), Serena Williams (1999), Svetlana Kuznetsova (2004), Kim Clijsters (2005), Samantha Stosur (2011), Flavia Pennetta (2015) leh Sloane Stephens (2017) te chuan an Grand Slam title hmasa ber an la tawh a, an hnung zuiin kuminah chuan Osaka hming a chuang ve ta.

Serena A mualpho!
Nikum September thla khan Serena Williams hian fanu Alexis Olympia a hring a, fa a neih hnua a thil tum ber chu Grand Slam nomawi chawi a ni; hei hi a ti thei a nih chuan Margaret Court (24 titles) nih rualin tennis player zingah major tournament chawi hnem ber a ni ang.

Wimbledon final khel phak mah se Angelique Kerber a ngam lo, an mahni khawpui New York-ah ngei hlawhtlinna chan theihna hun a nei. Mahse, beisei angin a khel thei ta lo, set hmasa zawkah double faults vawi li ngawt neiin - unforced errors vawi 13 a nei hial bawk.

A beisei anga a khelh theih loh vangin Serena hian a mizia a hloh tih hmuh theihin a awm, coach Patrick Mouratoglou nen an inbia tih hriat niin, warning pek a ni. Grand Slam bikah chuan inkhelh laiin player leh coach te an inbiak pawh tawn khap a ni.

Tennis dan ang chuan dan an bawhchhiat hmasak berah warning pek an ni a, chu mi hnuah an bawh chhe leh a nih chuan point penalty niin, a vawi thumnaah chuan game penalty a awm bakah match penalty thlengin a pek chhoh theih.

Set hnihna an khelh laiin 3-2 a ni a, Serena hian thinrim vangin racquet a vaw chhia a, point penalty a nih avangin Osaka-i'n game lehpekah 15-0 in bul a ṭan theih phah. Japanese nula a khel ṭha zui a, 4-3 in hma a hruai. Serena erawh chu umpire Ramos chunga a lungawi lohna hri thla chhunzawmin, "Ka khel hi vawi khatmah i kaihruai tawh lo ang. Thutlukna dik lo i siam a, ngaihdam min dil tur a nia. Ka point min ruk sak," tiin a chhuah chhal a, American nula hi a ṭawngkam avangin hremna hmu zuiin 5-3 in a hnufual. Serena hian a service-ah point khat pawh hloh loin la mah se Osaka a chesual duh lo a, a service la chhunzawmin 6-4 in set hnuhnung zawk a la.

Grand Slam vawi 23 champion tawh Serena chuan coach nen inbiakna an neih loh thu sawiin, "Tennis ka khelh chhungin dik lo taka chak loh ka duh ngai lo, chu ai chuan a chak lo zawka ṭan mai ka duh ṭhin," a ti. He tih lai hian coach Patrick Mouratoglou erawh chuan player chu zaizir a tih dan tur a hrilh thu leh, coach dang pawhin an tih ve vek thu a sawi a, chutih rualin "Serena khan ka thil tih a hmu kher lo ang," a ti.

Thil thleng duhawm lo avangin lawmman sem boruak thlengin a vaw chhia a, umpire Carlos Ramos pawhin court chhuahsanin a rawn let tawh lo. Mipui lungawiin 'boo' tiin an au rual a, Osaka chuan thil thlen dan pawi tiin a lukhum hmangin a mittui a hliah. Serena rawn pen chhuakin mipui chu ngawi turin a hrilh a, Osaka hlawhtlinna lawmpui turin a ngen a. US mipuiin an legend thusawi zawmin Osaka an lawmpui a, Japanese nula hian duhsakna dawng tlakin a khel ṭha reng a ni.