NE Snooker C'ship-ah Lalrina a champion

Aijal Club North East Snooker Championship 2018-ah Lalrina Renthlei a champion.

Inrinni khan Aijal Club Billiards room-ah final hi khelh a ni a, Tuikhuahtlang tlangval Lalrina chuan K. Lallawmkima chu 4-0 a hnehin a champion.

Mizoram Snooker & Billiards Association hian India hmarchhak pum huap inelna hi vawi hnih a buatsaihna a ni a, Lalrina hian hnehna a chang ve ve.

Lalrina hi Mizo infiammite zingah chuan mi bik a ni a, snooker-ah Mizoram number 1 a nih bakah basketball lamah pawh player ṭha ber zinga mi a ni. MSL4-ah khan Lalrina hian MVP niin Zarkawt BCA chu a champion pui a, hemi hma hian Mission Veng Vikings chu MSL-ah champion puiin tualchhung basketball inelna sang bera club pahnih champion pui thei hmasa ber a ni.

Kumin May thla khan Lalrina hi India basketball team probables-ah koh a ni a, final squad-a a tel tak loh avangin India aiawha snooker leh basketball-a a tel theihna hun ṭha a hloh.

India ramin Hyderabad-a FIBA 3x3 World Tour Masters a thleng dawn a, inelna thlengtu hi wildcard hmangin team neih phalsak niin Lalrina hi first pick a ni pha a, Banglore 3BL aiawhin a inlan ang.