Brazil chakna Neymar & Firmino

World Cup quarterfinal an paltlang zawh loh hnua an match hmasa berah Brazil-in hnehna chang turin harsatna an tawk lo a, friendly match-ah USA chu 2-0 in an hneh.

Selecao tan Roberto Firmino leh Neymar ten goal khat ve ve an khung a, USA-in a chhanletna tur an nei lo. Liverpool forward Firmino hian Douglas Costa hnen aṭanga a ball hmuh ṭha tak chu minute 11-naah hnai set sawt aṭangin a khung.

Brazil hian minute 43-naah penalty an hlawh chhuak zui a, Liverpool midfielder Fabinho hlawhchhuah a ni. Paris St-Germain striker Neymar chuan hei hi goal-ah a chantir a, ram tan match 91-a khelha a goal 58-na chiah a ni.

Everton forward Richarlison chu second half-ah tlan luhtir ve a ni bawk a, ram tana a inlan hmasak ber a ni.