Argentina tan Simeone-a fapa!

Atletico Madrid manager Diego Simeone-a fapa Giovanni Simeone chuan Argentina tana a match hmasa berah goal a khung nghal a, a pa hnenah lawmthu a sawi zui.

Argentina hian World Cup hnua an match hmasa berah Guatemala an hmachhawn a, 3-0 in an sawp. Giovanni bakah hian Giovani Lo Celso leh Gonzalo Nicolas Martinez (penalty) te chuan goal khat ṭheuh an thawh bawk.

Kum 23 mi Fiorentina striker hi Diego-a fapa pathum zinga a upa ber niin season hmasa khan Serie A-ah goal 14 a khung a, World Cup zawh hnuah a vawi khat nan ram tan koh a ni.

River Plate aṭanga a career ṭantu striker chuan, "River Plate-ah naupang mai ka nih lai khan ka pa chuan ram tana ka la khelh tur thu hi min hrilh ṭhin a ni," tiin a pa rinna chuan a hnuh kal thu a sawi.

Argentina coach lailawk Lionel Scaloni chuan player langsar tak tak Lionel Messi, Gonzalo Higuain leh Sergio Aguero te chu Guatemala hmachhawn tur hian a ko lo!