MPL7-ah Chanmari FC-in bul ṭan ṭha

McDowell's No.1 Soda Mizoram Premier League Season 7 round 1 chu Zirtawpni zan khan khelh zawh a ni a, inkhel harsa ber tura ngaihah Chanmari FC-in an elpui Ramhlun North FC chu 2-0 in an hneh a, goal difference hmangin Lalruatliana Sailo hote hi league hmahruaitu an ni.

Lammual inkhel nung ṭha takah Chanmari tan Lal­nun­tluanga leh Lalnunzama ten goal an khung a, kumin Khelo India-a Mizoram champion puitu leh best player Zama chu man of the match a thlan a ni.

Mizorama football inelna sang berah Chanmari FC leh Aizawl FC te vawi hnih ve ve an champion tawh a, tualchhung club lian pahnih hi September 13 tlaiah an inhmachhawn nghal ang.

Team Boruak

Chanmari FC-in MFA Super Cup final hial thleng mah se I Day Football group stage-ah Aizawl FC lakah goal ruk zet an chhuah a, knockout stage an thlen phak loh bakah player ṭhenkhat an chhuah bawk avangin an phur vanglai a ni lo.

Ramhlun North erawh MPL ṭan hma inelna pahnihah che ṭha tawk lo chungin I League tawnhriat nei tawh Waheed Adekunle leh coach F. Lalrozara te an neih thar avangin an phur chho viau thung.

An inkhel ta

Ramhlun North-in bul an ṭan ṭha a, an goal nawr pawh an na hle, amaherawhchu an tawnhriat neih tam tawk lohna a lang a, an hmanhmawh mah mah avangin an game a nghet ṭha tawk lo.

Chanmari tlarhnung a phui ṭha lo a, defence leh keeper inkarah awl a awm ṭhin avangin Ramhlun North an hlauhawm hle. Foward che rang Lalliansanga'n (Notea) Chanmarians defender C. Lalrosanga ball chhuhsakin keeper chauh a hmachhawn a, keeper Lalruatpuia'n a dan sak.

Ramhlun North-in a pawi­mawh ber goal an khung thei lo a, Chanmari erawhin hun ṭha an neih hmasak berah an pet goal nghal. Minute 10-naah Bawngkawn tlangval Lalnuntluanga'n corner aṭanga ball kal chu box pawnah chang fuhin goal-ah a pet a, Chanmari player a per hnuah goal kilah a lut.

Rozara hote an beidawng lo a, an nawr chhunzawm zel a. Vei lam aṭanga Laldingngheta ball vawrh luh chu Nigerian forward Waheed chuan ṭha takin a la thla a, keeper Lalruatpuia inrawlh hnuah Ramhlun North striker a tlu.

Referee F. Lalramsanga’n Nigerian forward chu tluk der vang­in yellow card a pe a, replay aṭanga ennawnin thutlukna hi eng zawng pawha kal ve ve theih a nih avangin Chanmari an vannei hle.

Zama a rawn lang

Chanmari FC-in dinhmun sawh nghet turin goal dang an mamawh a, minute 40-naah rawlthar duhawm Zama chuan corner aṭanga ball kal chu a tu khumin a tauh lut a, goal ṭha tak a ni. First half-ah Chanmarians in goal hnih an khung hman a, coach Lalruatliana Sailo-in halftime a hmang ṭha bawk.

Second half-ah Chanmari tlarhnung pawp lai chu rem phui­in a awm a, Ramhlun North tan chet lak a har tawh. Chutihrualin Durtlang tlangval Notea'n Nigerian forward Waheed-a hnen aṭanga a ball hmuh goal-ah a chantir se Chanmari tan bual theihna tur a ni ang. Amaherawchu, Ramhlun North-in goal an khung miau loh avangin Chanmariin harsatna nei loin MPL7 match hmasa berah hnehna an chang.

Insiamṭhat mamawh

Chanmari FC coach Lalruat­liana Sailo chuan, "Kan khelh danah insiamṭhatna tur a la tam hle. A bik takin tlarhnung lam rem phui kan la mamawh. Chutihrualin point thum kan hmuh avangin ka lawm hle," tiin inkhel chungchang a sawi.

Goal khungtu Zama chungchang sawiin Tawia chuan, "Player naupang a ni a, a kum a la naupan avangin bench-ah la dah rih ka duh a, pressure pek ka duh lo. Tun hi ka hnuaia vawi hnih inkhel bul a ṭanna chauh a ni a, khelhna hun a neih chuan a khel ṭha zel a ni," tiin a fak.

Ramhlun North coach F. Lalrozara chuan, "Kan chance hlah zozai kha a uiawm a, chak theihna tur a ni. Kan player pawimawh zingah Valtea chu damloh vangin bul kan ṭantir thei lo a, Felpuia damloh vangin kan chhawr thei lo bawk a, kan ṭhat dan ber turin kan la khel thei lo," tiin an kim loh thu a sawi.

Referee thutlukna chung­chang sawiin Rozara chuan, "Waheed-a an tihtluk chung­chang­ah chuan kei chuan penalty ngei tur niin ka hmu a, amaherawhchu referee thutlukna ka pawm e," tiin Vanglaini a hrilh.