UEFA Nations League ; Spain lakah England an vanduai
World Cup hnua an match hmasa berah England-in Russia-a semifinal an luh kha tihpalh thil thu a ni lo tih pholan tum mah se Spain lakah 1-2 in an vanduai a, kum 2008 hnua a vawi khat nan Wembley-ah an tlawm.
England tan khel ṭha em em mai Marcus Rashford chuan goal khat a khung a, Spain-in Saul Niguez leh Rodrigo Moreno ten goal khat ve ve khungin coach thar Luis Enrique hoin an chak.
Three Lions-in referee thutluknaah lungawi lohna tur an nei. Danny Welbeck chuan hun pek belhah an si phurh sutna goal a khung niin ngai mah se David de Gea nen ball an inchuhna lamah Spain keeper a tlu a, referee-in Welbeck a 'foul'-ah ngaiin goal-ah a pawmsak lo.
Inkhel chu
Wembley Stadium-ah England-in goal an khung hmasa zawk a, Marcus Rashford chuan England goal hmahruai hi Manchester United tana a khelhpui De Gea venah a pet lut.
Mahse, Spain-in team ṭha zawk an nihna pholangin inkhel an thunun zui a, Three Lions aiin La Roja player-te an thiam zawk - goal an chhuah aṭangin minute hnih a liam hman chauh tihah Saul Niguez chuan si phurh a sut ve nghal.
Minute 32-na a ni a, goal khungtu chu Spain bawk an ni. La Roja squad aṭanga Diego Costa a inhnuhdawh avanga inkhel bul ṭantu Rodrigo chuan an ram team tan khelh a phu tih pholangin an hmahruaina goal a khung.
Vanduai England
Chawlhlawk hman hnu thlengin Spain-in inkhel an thunun chhunzawm a, hun tawp hnaih lamah England an ṭha sawt thung a, Three Lions-in Wembley-a tlawm duh loin an nawr na hle.
Hun pek belhah Welbeck hmangin an si phurh an sut niin an hria a, referee-in ngaihdan dang a nei thung. Replay en chuan De Gea hian ball a man vek tawh hnuah ding nghet zo loin a ball thlauh pet luttu Welbeck a delh niin a lang a, mahse referee-in goal-ah a pawm tlat lo.
Hetihrual hian England tan Rashford chu fak phu a ni a, United striker hian goal a khung bakah vawi hnih ngawt goal khungna hun ṭha dang a nei a, mahse De Gea chet ṭhat ṭum a tawn avangin a vanduai.
Shaw a inhliam
Hliam vangin Luke Shaw lakchhuah a ngai a, United defender hi a vanduai ṭhin hle. Khawvela left back beiseiawm ber pawla sawi a nichungin hliam vangin a talbuai fo a, beisei a phak loh phah.
Tun season-ah Shaw hian a theihna tak tak pholang leh ṭanin United tan defender pawimawh a ni a, March 2017 hnuah a vawi khat nan England tan koh niin inkhel bul ṭantir a ni a, Rashford goal khung tur a siamsak nghal.
Shaw chuan, "Ka dinhmun ngaihvena min ngaihtuahtu te zawng zawng chungah lawmthu ka sawi a, ngaihtuahawm ka ni lo. Ka hmaa inchhawp chu hmachhawn mai ṭhin ka ni a, ṭha takin ka lo kir leh ang," a ti.
Lungti leng inkhel!
World Cup zawh rualin Spain tan player pawimawh Andres Iniesta, Gerard Pique leh David Silva ten ram tana inkhelh an chawlhsan thu an puang vek a, player pathum tel loin a vawi khat nan Spain an inlan.
La Roja hian coach thar Luis Enrique an nei thung a, Barcelona boss hlui enkawlna hnuaiah beisei an nei sang hle. Enrique hian World Cup hmaa Real Madird a inrempui avanga ban tak Julen Lopetegui hmun ruak luahtu Fernando Hierro a thlak a, Wembley-ah hnehna a chang nghal thei hi a lawm khawp ang.
Spain starting XI enin football fans tam tak lung a leng a, England lam pawh an kim tawh bik lo. Leicester City striker Jamie Vardy leh Chelsea defender Gary Cahill ten ram tana inkhelh an chawlhsan thu an puang a, Three Lions squad-ah hmuh tur an awm tawh lo.
Inkhel Result
International Friendly
South Korea 2 - 0 Costa Rica
USA 0 - 2 Brazil
Mexico 1 - 4 Uruguay
Argentina 3 - 0 Guatemala
UEFA Nations League
Italy 1 - 1 Poland
Turkey 1 - 2 Russia
Switzerland 6 - 0 Iceland
England 1 - 2 Spain
Northern Ireland 1 - 2 Bosnia-Herzegovina
Africa Cup of Nations Qualification
Comoros 1 - 1 Cameroon
Egypt 6 - 0 Niger
Zanin Inkhel Tur
UEFA Nations League
League A
Portugal 12:15 AM Italy
League B
Sweden 12:15 AM Turkey