A la tawp lo - Nadal
Rafael Nadal chuan khup hliam vangin US Open semifinal a khel tluan thei lo a, world number 1 hian season tharah inlan leh a tum thu leh a tan inelna a tawp nghal tihna a nih loh thu a sawi.
Zirtawpni zan khan Nadal leh Juan Martin del Potro ten semifinal an khel, Argentine tlangvalin 7-6 (7-3), 6-2 a hma a hruai laiin Nadal hi khup hliam vangin a inkhel zui thei lo.
Kum 32 mi Nadal chuan, "Rim takin ka beih chhunzawm ang, season duhawm tak ka hmang a, nakkumah pawh US Open hi khelh leh theih ngei ka inbeisei," a ti. Nadal hian tun hnai season hnih chhungin Grand Slam final vawi li a lut phak a ni.
Grand Slam vawi 17 champion tawh Nadal a inhliam takah chuan an ramin Davis Cup semifinal an khelh hunah pawh a inlan thei dawn lo, Spain leh France ten final luh hi an inchuh dawn a ni.
US Open mipa semifinal dangah Novak Djokovic chuan Kei Nishikori a hneh ve thung a, nizan khan Serbian tlangval leh Del Potro ten nomawi inchuh zuiin, result kan hre hman lo.