Lin Dan hun a liam ve ta

A ban vei lam hmanga badminton roreltu Lin Dan chuan infiamna khawvel a chawlhsan thu a puang. A hming lem atana 'Super Dan' tih an vuahsak Chinese star hian season 20 chhung a hum tawh Badminton Racquet chu a mangṭha ve ta.

Lin Dan hi kum 36 mi a ni tawh, a hun hnuhnung lamah hliamin tibuai ve deuh mah se a vanglaiin Olympic gold medal vawi hnih - Beijing 2008 leh London 2012 a la hman. World champion vawi nga bakah All England title paruk a lakte en hian a ropuizia a tichiang.

Nikum June thla khan legend Lee Chong Wei a lo chawl tawh bawk, nakkuma Tokyo Olympic 2020 an neih hunah badminton player ropui pahnih Lin Dan leh Chong Wei te tel loin inelna an neih a ngai tawh dawn.

July 4, Inrinni khan China rama social media pakhat twitter anga an hman Weibo-ah Lin Dan chuan a chawlh thu a puang. Lin-a chuan, "2000 aṭanga 2020 inkar, kum 20 ka chamchilh hnuah national team chu ka mangṭha ve ta. Thutlukna siam harsa leh hrehawm tak chu a ni.

"Kum 37 mi ka ni tawh a, ka hriselna dinhmun bakah hliam neuh neuh vangin midang kianga inkhel reng turin ka tling tawk ta lo. Lawmna, hrehna leh thinurna a inkawp khawm a ni," tiin a hun hnuhnunga a rilru a sawi. Chhungkaw tana hun tam zawk hmang tur leh nunphung thar a hman tur thu a sawi bawk.

Badminton chungchang sawi zawmin Lin Dan chuan, "Hun harsa leh hrehawm ka tawn chang hian, rei tak ka inkhelh theih nan 'ti hram rawh' tih hi ka infuihna a ni ṭhin. Infiamna ka ngainat leh hmangaih tan hian ka engkim ka hlan a ni. "Rawlthar rawn chhuak tharte ka cho duhna chu ranking sang tak neih ringawt aiin rei tak khel thei turin an invawng thei em tih leh, beidawng loin kum upa tak thleng infiammi thinlung pu thei se ka duh zawk," a ti. Coach, chhungkua leh fans bakah a khingpuite lakah lawmthu a sawi bawk.

Olympic vawi hnih champion Lin Dan hian 2010 khan amah ang bawka badminton khel thiam Xie Xingfang chu 2010 khan nupui atan a nei a, 2016 November khan an fa hmasa ber Xiao Yu an nei - China khawpui Beijing-ah chhungkuain an cheng.

Hmeichhe badminton world champion ni tawh Xingfang chuan, "Hun rei tak chhung kawng inang kan zawh a, tunah pawh kawng inang kan zawh chhunzawm leh ang. Eng pawh hmachhawn dawn ila theihtawp kan chhuah zel ang," tiin a pasal chungchang a sawi.

Chinese Badminton Asso-ciation chuan thu chhuah siamin, "All England Open 2020 khelh zawh hnu khan Lin hian Sichuan-ah Chinese national team a zawm. Inelna hmachhawn leh mai tur ni mah se tournament buatsaih theih a nih loh bakah a hliam a dam fel thei lo. "A tan training pangngai neih reng a harsa a, a tawpah chuan a chawlh thu hi a puan a ngai ta," an ti. Chinese Badminton Association president Zhang Jun chuan Lin Dan chu ram tana a sulhnu ropui hnutchhiah zawng zawngte avangin a chungah lawmthu a sawi.