Mancini enkawl Italy-in point an hmu

World Cup an khelh phak loh hnuah Italy chuan mana­ger thar Roberto Mancini kaihhruaina hnuaiah fiahna an hmachawn ṭan a, Zirtawpni zan UEFA Nations League inkhelah an mikhual Poland nen 1-1 in an inhnehtawk.

UEFA Nations League inkhel dangah Switzerland chuan Iceland 6-0 in an sawp thung a, Belgium pawhin an mikhualna ramah Scotland chu 4-0 in an va luhchhuah bawk. Swiss team hian Thawhlehni zan dar 12:30-ah England an lenchilh leh nghal dawn a, zanin hian Portugal mualah Mancini naute an lenglut zui thung ang.

UEFA Nations League khelh ṭan a ni a, League A Group 3-ah Azzurri, Poland leh Euro 2016 champion Portugal te an awm. Group hmahruaitu hian nakkum June-ah playoff an khel dawn a ni. Kar tawp inkhel dangah Spain, Russia, Serbia, Albania leh Faroe Islands ten hnehna an chang bawk.

Jorginho goal

Manchester City manager hlui Mancini-a'n an ram team a enkawl hnua a competitive match hmasa ber a hmachhawn a, mikhual Poland lamin chawlh­lawk hma deuhin Piotr Zielinski-a goal hmangin hma an hruai, tun hnaia result ṭha nei hleithei lo Italy chu anmahni mualah an mualpho dawn niin a lang.

Mahse, second half minute 78-naah Jakub Blaszczykowski chuan substitute Federico Chiesa lakah penalty a chawi a, a pet turin Jorginho a rawn ding chhuak. Chelsea midfielder thar hian Lukasz Fabianski bumin si phurh a sut a, goal dang a lut tawh lo.

Italy tan Mario Balotelli chu 2014 World Cup hnua a vawi khat nan a inlan leh a, Liverpool striker hlui hian Inter Milan leh Man City lama amah enkawl tawhtu Mancini rinna hlawh mah se goal erawh a keng tel nghal lo; second half-ah thlak a ni.

Azzurri-in Saudi Arabia 2-1 a an hneh bak chu an match hnuhnung pariatah chakni hmel an hmu lo a, tuna Poland nen an inhnehtawk hi result ṭha tak ni lo mah se a tlawm zawka an ṭan loh avangin lawmna tur a awm tho ang. Mahse, football thiam ram tan mahni mikhual laka siphurh sut hram hi inchhuanna tur chi a ni lo.

Kum 53 mi Mancini chuan a naute chungah rinna a nghah thu sawiin, "Football chu thluak hman ngaihna a ni a, thiamna ai mahin finna a pawimawh chang a awm. Ram tana inpe, theihna nei sang leh hmalam pan duh mi kan mamawh, chutiang chu ka naute zingah an tam," tiin a sawi.

Shaqiri inlar

Liverpool midfielder Xher­dan Shaqiri-a'n Switzerland tan goal a khung bakah a ṭhiante khung tur vawi hnih siam siakin Iceland 6-0 in an sawp a, Swiss team-in UEFA Nations League bul an ṭan fuh hle.

Group A2 inkhelah Shaqiri chuan freekick aṭangin an goal thumna a khung, ani hma hian Steven Zuber leh Denis Zakaria te chuan goal an khung tawh bawk. Switzerland lamin an duhtawk mai lo, Haris Seferovic, Albian Ajeti leh Admir Mehmedi ten goal khat ṭheuh an belh bawk.

Stoke City midfielder hlui hi an ram tan inkhel khaikhawmtu a nih bakah set piece pettu a ni a, Seferovic leh Mehmedi te goal khung chu a freekick pet aṭanga chhuak a ni.

Scotland an mualpho

Alex McLeish kaihhruaina hnuaiah Scotland chuan hma lam an pan thei rih lo, match nga an khelh tawhah a vawi li nan an tlawm. Mikhual Belgium tan Romelu Lukaku leh Eden Hazard ten goal an khung hnuah striker Michy Batshuayi-a'n goal hnih a khung belh a, hnehna chang turin harsatna an tawk lo.

1973 khan England lakah Scotland hi 5-0 in an tlawm tawh a, hemi tih lohah chuan anmahni mual ngeia an chak loh chian ber ṭum a ni. McLeish-a'n a enkawl hnuah si khat faiin Hungary an hneh ve tawh, match dangah erawh Costa Rica, Peru, Mexico leh Belgium te an ngam lo vek.