Suarez-a'n Uruguay chakpui

Kum 31 mi Luis Suarez-a'n a la tar lo tih an ram tan a pholang leh ta a, Mexico lakah goal hnih khungin Uruguay chu 4-1 in hnehna a chanpui.

Uruguay tan Jose Gimenez chuan minute 21-naah goal hmahruai a khung nghal a, Mexico-in minute 25-naa Raul Jimenez penalty chhuih luh hmangin an sut ve lehnghal.

Inkhel inhnehtawk tak a ni dawn emaw tih laiin team pahnih danglamna a lo lang a, chu chu Luis Suarez a ni. Liverpool striker hian minute 32-naah freekick hmangin hmahruaina goal a khung nawn a, 'panenka' hmanga penalty chhuih lutin minute 59-naah Gaston Pereiro pet goal tur chu ṭha zetin a siamsak bawk.

Mexico lam hian goal khat dang khung ve lehna remchang nei mah se Jimenez chuan a penalty vawi hnihna a pet goal thei lo a, Fernando Muslera chuan a dan sak.

World Cup last 16 aṭanga an tlak hnuah coach Juan Carlo Osorio a ban avangin Mexico hi coach lailawk Ricardo Ferretti enkawlna hnuaiah an khel a, Javier Hernandez, Andres Guardado leh Hector Herrera te chu koh an ni lo.

Uruguay hi coach Oscar Tabarez chuan a ho thei bik lo a, kum 71 mi manager hian an ram team a enkawl chhunzawm zel dawn leh dawn loh a la chiang lo a ni.