Egypt tan Mo Salah a langsar

Africa Cup of Nations 2019 qualifier-ah Mohamed Salah a langsar a, Liverpool forward hian Egypt tan goal hnih khungin Niger lakah an ram team hi 6-0 in hnehna a chanpui.

Salah hian goal hnih a khung bakah assist vawi hnih a nei tel a, penalty vawi hnih ngawt a pet goal lo bawk! Egypt tan hian Salah bakah Marwan Mohsen, Ayman Ashraf, Salah Mohsen leh Mohamed Elneny ten goal khat ve ve an khung bawk.

FIFA Player of the Year ni thei tura hming chhawpchhuah pathum zinga tel Salah hian hattrick siamna remchang a nei a, mahse a ball pass tawh sa chu goal ruak chauh a hmachhawn tawh tihah Mohsen chuan a pe let na hret a, a pet goal hman lo.

Kum 26 mi forward hian season hman zawh takah khan Liverpool chu goal 44 a khungsak a, tun season-ah match li khelin goal hnih a khung sak leh tawh bawk.

Egypt chu kum 1990 hnua a vawi khat nan World Cup a hruai thleng bawk a, ram tan match 60 khelhsak tawhin goal 37 a khung sak a, kumin bikah vawi li inlan tawhin goal nga a khung.