DFB Pokal-ah Bayern an champion

Bayern Munich-in DFB Pokal nomawi chawi turin Inrinni zan khan Bayer Leverkusen 4-2 in an hneh a, a vawi 20 nan German Cup-ah an champion. Bavarians hian Bundesliga nomawi an chawi tawh avangin treble champion turin Champions League chiah champion a ngai ta.

Olympiastadion, Berlin-ah Hansi Flick-a hoten inkhel an thunun a, Bavarians tan Robert Lewandowski-a'n goal hnih khungin David Alaba leh Serge Gnabry ten goal khat ve ve an khung. Leverkusen tana Sven Bender leh Kai Havertz te goal khung chu scoreline ti mawitu chauh a ni.

Bayern manager Hansi Flick-a'n final khel tur a thlan danah mak tih tur a awm lo a, Liverpool nena sawi zawm Thiago Alcantara leh Reds player hlui Philippe Countinho erawh bench-ah an awm.

Goal khung khawl Robert Lewandowksi thlawp turin Kingsley Coman, Thomas Muller leh Serge Gnabry te an awm a, midfield-ah Leon Goretzka leh Joshua Kimmich te an inkawp. Tlarhnungah Alphonso Davies, David Alaba, Jerome Boateng leh Benjamin Pavard te an awm a, Germany number 1 keeper Manuel Neuer chu si ban nghaktu a ni.

Bayern Munich-in team ṭha zawk an ni tih an lantir a, goal pawh an khung hma. Minute 16-na lekah Lewandowski freekick hlawhchhuah chu David Alaba-a'n mawi zetin goal kilah tak a pet lut. Bayern-in minute riat hnuah goal dang an khung lehnghal a, Kimmich-a ball fing um luttu Gnabry-a'n mawi zetin a pet lut.

Leverkusen-in insiamṭhat tumin Kevin Volland leh Kerem Demirbay te luhtir nghal mah se Bayern bawkin goal an khung hmasa zawk. Minute 59-naah Neuer-a ball pet chhuah chu Lewandowski-a'n la thlain goal-ah kawh zetin a pet a, keeper Lukas Hradecky tihsual zarah a lut.

Bayer Leverkusen beiseina siam turin Sven Bender-a'n minute 63-naah a tauh lut a, amaherawhchu team ṭha zawk Bayern tan hlauhthawn tur a awm lo. Minute 89-naah Lewy-a'n cool zetin a goal hnihna leh Bayern goal lina a khung a, Leverkusen chhuanvawr Kai Havertz-a'n penalty aṭangin a khung a, goal dang a luh belh lo.

Bayern Munich-in hnehsawh takin Bundesliga nomawi an chawi a, Manchester City aṭangin Leroy Sane an lalut. Bayern chief executive Karl-Heinz Rummenigge-a'n German player ṭha ber lakluh chu an club duhdan a nih thu a sawi a, club chhung inelna boruak pawh a nung tih a lang nghal.

Bavarians-in Sane hi la chhawr thei lo mah se nghawng a awm nghal ang hialin a ngaih theih. Serge Gnabry-a'n June 6 hnuah goal a rawn khung a, Kingsley Coman-a'n goal khung lo mah se a khel ṭha a, substitute Perisic-a'n assist a rawn nei bawk. 

Germany coach Joachim Low-a'n Muller leh Boateng te duh tawh lo mah se Bayern tan erawh tawnhriat nei player pahnih hi an la rintlak hle. Chutihrualin Low-a duhlai Joshua Kimmich pawh Flick-a hnuaiah defensive midfield hna a hnehsawh tawh a, goal venhim chauh ni loin goal nawr thlengin a ṭangkai takzet. Bayern hian German record siamin match 17 chhung inelna hrang hrangah an chak zawn tawh a, August thlaa Champions League khelh ṭan hunah chhunzawm an tum ang.

German Cup final-a goal hnih khungtu Robert Lewandowski chuan a career-a a vawi khat nan season khatah goal 50 a khung tling. Polish striker hian Bundesliga-ah goal 34 khungin top scorer a ni a, DFB-Pokal-ah goal ruk khungin a pet goal tam ber bawk.

Kum 31 mi Lewandowski hi Champions League khelh mekah goal 11 khung tling tawhin top scorer ni lai a ni a, tun season-ah inelna hrang hrangah goal 51 a khung tling tawh. Lewy chuan, "Hma ka sawn zel dan tur ka ngaihtuah a, team ka puih theih dan tur ka suangtuah ṭhin. Leverkusen lakah team ṭha zawk kan ni tih kan lantir a, chak duhna thinlung nen kan khel chhuak," tiin an khelh danah a lungawi thu a sawi. Lewandowski hian tun season Bundesliga club 18 lakah goal a khung ve tawh a, chung zingah chuan a khelh mekna Bayern Munich pawh a tel. Polish striker hian Borussia Dortmund a khelh laiin Bavarians lamah hian a khung fo tawh a ni.

Bayern Munich champion kalkawng

First Round

Energie Cottbus    1 - 3    Bayern Munich

ENE :  Taz 90+3' (P)

BAY : Robert Lewandowski 32'; Kingsley Coman 65'; 

   Leon Goretzka 85'

Second Round

VfL Bochum    1 - 2    Bayern Munich

BOC : Davies 35' (OG)

BAY : Serge Gnabry 83'; Thomas Müller 89'

Third Round

Bayern Munich    4 - 3    1899 Hoffenheim

BAY : Hubner 13' (OG); Thomas Muller 20'; 

   Robert Lewandowski 36', 80'

HOF : Boateng 8' (OG): Dabour 82', 90+2'

Quarterfinal

Schalke 04    0 - 1    Bayern Munich

BAY : Joshua Kimmich 40'

Semifinal

Bayern Munich    2 - 1    Eintracht Frankfurt

BAY : Ivan Perisic 14'; Robert Lewandowski 74'

EIN : Da Costa 69'

Final

Bayer Leverkusen    2 - 4    Bayern Munich

BAY : Sven Bender 63'; Kai Havertz 90+5' (P)

MAN : David Alaba 16'; Serge Gnabry 24'; 

   Robert Lewandowski 59', 89'