Ronaldo tel lohna Portugal-in Italy hneh
European champion Portugal-in inelna thar UEFA Nations League an khelh hmasak berah Italy chu Estádio da Luz-ah mikhualin André Silva goal hmangin 1-0 in hnehna an chang.
Thawhṭanni zan inkhelah hian Portugal tan Cristiano Ronaldo a tel lo a, goal khungtu Silva hi Italian club AC Milan-a beisei phak loh vanga loan hmanga Sevilla-a khel mek a ni.
Chak phu Portugal
Portugal-in ṭan phat aṭangin inkhel an thunun nghal a, William Carvalho chuan hnai tak aṭangin a tauh lut lo.
Italy tlarhnung an awm fual hrim hrim a, Portugal-in Italian keeper Gianluigi Donnarumma tana harsa tur khawp chance ṭha an insiam thei lo a. Chutirhualin midfielder Bernardo Silva ball pet erawh goalline aṭangin defender Alessio Romagnoli-a'n ṭha takin a dang thung.
First half-ah Portugal midfielder Bruma pet chuan an dan per hnuah crossbar a per a, hemi hnu hian midfielder Pizzi chu Italy box chhungah ball tel loin dan ni mah se penalty pek a ni lo a, hun chanve hma lamah goal hmuh tur a awm lo.
Second half minute thumna lekah Silva-a'n Bruma hnen aṭanga a ball hmuh chu ding lam aṭangin a ke vei lam hmangin goal kilah a khung.
Italy-in goal an chhuah hnuah pawh goal hmaah Portugal zawk an hlauhawm a, Manchester City midfielder Bernardo Silva leh Benfica midfielder Pizzi ten keeper Donnarumma tan hna an siam ve ve.
Goal dang hmuh tur a awm zui tawh lo a, Portugal-in Italy 1-0 in an hneh a, an League A - group 3-ah hmahruaitu an ni.
Santos a lawm
Portugal coach Fernando Santos chuan, "Khawvela player ṭha ber Ronaldo hoin kan team hian nasa takin hma a sawn a, ani a awm chuan kan ṭha sawt ang. Tunah erawh a awm lo a, midang chungah rinna ka nghat a, an hun ṭha neih an hmang ṭha a ni," tiin player awm lo Cristiano Ronaldo a fak tel hram.
Euro 2016-a Portugal champion puitu coach chuan, "Training-naah an theihna zawng zawng an chhuah a, thlan tur an tam hi team tan a ṭha. Kan team chungah hian rinna ka nghat ngam a ni," tiin a player-te a rin thu a sawi.
Mancini a lawm lo
Italy coach Roberto Mancini chuan, "Tihsual kan ngah a, kan neih tlem tial tial a ṭul a ni. Chutihrualin ka nauten an theihna zawng zawng an chhuah tih ka hria a, goal khung tur erawhin ṭan kan lak a ṭul a, ruahmanna thar kan siam a ngai," tiin a sawi.
FIFA World Cup hnuhnung berah Italy an inlan phak lo a, an match hmasa berah Poland nen 1-1 in an hneh lo a, Portugal an hneh loh leh takah chuan match hnih khelhah pathumnaah an awm mek.
UEFA Nations League
• UEFA-in national team inkhelin ngaihven a hlawh theih nan friendly match tam zawk thlak nan inelna thar Nations League a duang chhuak a, inelna hi Europe ramte tan a ni.
• UEFA hnuaia ram 55 chu an ranking milin league paliah
ṭhendarh an ni.
• League A-ah ram 12 an awm a, group paliah an ṭhendarh. Group hming hi A1, A2, A3 leh A4-ah ṭhendarh a ni.
• League B (12 team), C (15 team), D (16 team) te pawh group A ang thoin group paliah vek ṭhendarh a ni bawk.
• Group tina a hniam ber ṭheuh hi anmahni awmna league hnuaiah chiah an tla ang a, a sang ber
ṭheuh an awmna chungah chiah an kai chho ang.
• League A bikah hian group tina a sang ber ṭheuh hian champion an zawng dawn. Nakkum June thla hian semifinal leh final hi khelh tur a ni a, single leg veka khelh tur a ni ang.
• UEFA Nations League hian UEFA Euro 2020 khel tur atan pawh nghawng a nei a, league tin hian quota pakhat ṭheuh an nei dawn. Euro Qualifier bik hrim hrim erawh a hrana kalpui tur a ni a, ram 55 chu group 10-ah ṭhendarh an ni ang. Group tin aṭangin pahnih ṭheuh an tling dawn. Euro C'ship-ah hian team 24 an inlan dawn a, hmun ruak pali dang zawn nan Nations League-a team dinhmun a pawimawh ang.