Profight-ah lawmman a pung dawn

Mizo zinga fight hmuhnawm leh ngaihven hlawh ber pawl LPS Pro Fight chu October 10 khian R. Dengṭhuama Indoor Stadium, Mualpuiah neih ṭan a ni leh dawn ta a, a vawi khat nan lawmman dawn tur tihpun a ni.

Kum 2009 khan LPS Pro Fight hi neih ṭan niin champion-in Rs. 40,000 an dawng ṭhin a, pahnihnain Rs. 10,000 an dawng ṭhin thung.

Kuminah pakhatna leh pahnihna lawmman hi Rs. 10,000 ve vea tihpun niin lawmmana sum sen ral tur ringawt hi a vaiin Rs. 4,40,000 a tling dawn.

Nikum khan lawmman hi Rs. 3,70,000 sem ral a ni a, kumina lawmman punna zat ringawt hi Rs. 70,000 a ni. Title chuh tur zawnna final-a chak lo tan pawh lawmman a awm dawn a, Rs. 10,000 ṭheuh an dawng ang a, semifinal-a chak zo lo ten Rs. 4,000 ṭheuh an dawng bawk ang.

Zothan Autoworks LPS Pro Fight-ah hian hmarchhak state Assam, Manipur leh Meghalaya aṭang pawhin fighter an lo tel dawn a ni. Inelnaa tel tumte tan nimin aṭang khan LPS Office, Zarkawtah form semchhuah ṭan a ni a, September chhungin lak theih a ni ang.