SAFF Championship ; Hmelma kumhlun India leh Pakistan intawng dawn

South Asian Football Federation hnuaia ram leh ram inelna sang ber SAFF Championship semifinal chu zanin hian khelh a ni dawn a, India leh an hmelma kumhlun Pakistan chu zanin dar 7:00-ah hian an intawng dawn.

Blue Tigers coach Stephen Constantine chuan, "Match dang ang tho a ni," tiin pressure sang lutuk tur vai kian tum mah se politics-a ram pahnih inlaichinna ngaihtuahin boruak a nep thei dawn lo tih a chiang.

Hetihlai hian vawiin chawhnu dar 3:30 hian semifinal hmasa zawk khelh a ni dawn a, Nepal leh Maldives te final luh inchuhin an khel ve dawn a ni. Semifinal pahnih hi D Sports chuan live-in a pe chhuak ang.

Pakistan an ṭha

Football-ah chuan 'Pakistan an ṭha' tih hi thil awihawm lo tak niin lang mah se tun ṭuma India dinhmuna nena ngaihtuah chuan thudik tak a ni miau si. India hian player senior rual hruai loin in enchhin nan an hmang a, Pakistan hi an ṭhat dan bera kal an ni thung.

Pakistan player zinga langsar ber tura ngaih chu Zesh Rehman a ni a, kum 34 mi defender hi kum uaithla tawh lam ni mah se Premier League thlenga lo khel tawh a nih avangin South Asian football level aṭanga thlir chuan dah hniam harsa tak a ni.

England-a piang, under 20 thlenga Three Lions tana age level-a inlan tawh defender hian 2003-06 chhung khan Fulham tan khelin Premier League-ah hial a inlan a, Fulham a chhuahsan hnuah pawh club langsar tak tak Queens Park Rangers, Norwich City leh Brighton tan a khel a, Hong Kong Premier League club Southern tan a khel mek.

A dang pawh!

Rehman chauh a ni lo - Pakistan player zingah ram pawna khel mek an awm nual. Kum 28 mi goalkeeper Yousuf Butt hi Canada tana age level-a inlan ṭhin niin Danish second division club Greve Fodbold tan a khel mek.

Kum 31 mi Hassan Bashir hi Danish second division club BSV tana khel a ni a, SAFF Cup-ah hian goal hnih khung tawhin India tan ven uluk a ṭul ang.

Coach José Antonio Nogueira hi Brazil mi niin Sao Paulo Under 15 coach hlui a ni a, Japanese club Nagoya Grampus lar vanglai khan 1994-96 chhungin an coach a lo ni tawh a, Saudi club langsar Al-Ahli pawh enkawl tawhin coach ṭha a nih thuah inhnialna tur a awm lo.

Chhuanlam thiang lo

India coach-in Sunil Chhetri leh Jeje Lalpekhlua te a hruai loh avangin chhuanlam siam a thiang dawn lo. Pakistan hian an player chhuanvawr Adnan Mohammad an hruai bik lo.

Kum 22 mi lek striker hi Copenhagen, Denmark-a piang ni mah se Pakistan tana inlan thlang a ni a, Danish Superliga club FC Helsingo tana khel mek striker hi Bangladesh-ah hruai ni se chuan buaipui tham tur a ni ang.

India squad-ah hian Mizo tlangval Jerry Lalrinzuala leh Lallianzuala Chhangte te an awm a, Maldives an hmachhawn ṭumin player pahnih hian inkhel bul an ṭan.