Shaw-a'n Watford hmachhawn thei lo

Manchester United left back Luke Shaw chuan September 8-a England leh Spain inkhelh ṭuma a intauhna vangin kartawpa Watford an hmachhawn hunah a inlan thei dawn lo.

Premier League danah chuan player hi insutna vanga a lua hliam a tuar a nih chuan ni sarih chhung a chawlh ngei ngei a ṭul. Spain nen an inkhelh ṭumin Shaw hi Dani Carvajal nen an intauhna lamah hliam a tuar a, oxygen pek a ngai hial. Medical room-ah Shaw hian ngai a awh a, a ṭhiante leh a chhungte biak remtihsak a ni nghal bawk.

England manager Gareth Southgate chuan, "Khatiang thil thleng kha chu tumahin kan hmu duh lo ang. A thlen zawh rual khan a pawi dawn tih a lang nghal a, lei a thlen hma khan engmah a hre lo tih a lang tawh. Kan medical team khan hna ṭha takin an thawk a, kan bulah ngai awh tura a awm hnuah an club-ah a kir leh tawh," tiin a sawi.

Spain nen an inkhelh hmaa hian Shaw chuan Champions League-a PSV Eindhoven nena an inhmachhawn ṭuma a ruh tliak chungchangah rilru lam thlenga a tawrh thu a sawi a, kum 23 mi lek nichungin football khelh chawlhsan a tum hman hial a ni.