Player kutah Girona v Barcelona innghat

Spanish Players' Union (AFE) chuan Girona-in Barcelona nena league match USA lama khelh an tum chu player-te kutah engkim a innghah thu an sawi a, player-te hian ram pawna inkhelh hi an remtih chuan kaltlangpui a ni ang.

Spanish La Liga thuneitute chuan media company pakhat Relevent nen US lamah league match khel turin kum 15 chhung atan inremna an ziak a, an inremna ang chuan La Liga club 20 te chuan league match khat tal US-ah an khel ṭheuh ang, tih a ni.

Girona chuan he inremna hi remchangah la nghalin January 27-a Barcelona an mikhual tur chu anmahni muala khel loa US lama khelh an duh. Mahse, Spanish player intelkhawm pawl hian ram pawna league match khelh an duh lohna leh rawn an nih loh avanga an lungawi lohna an lo sawi tawh a, Thawhṭanni zan khan La Liga nen an inbe nawn.

AFE chuan, "USA-a match khelh tur chungchangah reng reng player ten AFE kaltlangin thutlukna an siam ṭhin dawn a ni," an ti. La Liga lam chuan fan-te zinna leh thlenna tur chu senso an tum sak dawn a ni.