Mexican club Dorados-in Maradona an tlangzarh

Mexican second division club Dorados de Sinaloa chuan Thawhṭanni khan an coach thar Diego Maradona an tlangzarh a, Argentina legend hian a hming leh number 10 chuanna jersey chu a pholang.

Kum 57 mi Maradona hi ruihtheih thila a buai avangin nasa takin a mualpho tawh a, tuna a club awmna Mexico rama Sinaloa hi damdawi tawlhruk hmang awmkhawmna hmunpui anga ngaih a nih avangin sawi zui a hlawh hle.

Dorados hi an awmna league-ah 13-na dinhmun an hauh mek a, league match hmasa parukah chak hmel an la hmu lo. Heti chung hian Maradona chuan, "Chak kan duh a, kei chuan defensive football hi ka duh lo. Ka inkhelh hun lai angin attacking football kan khel ang," tiin a sawi.

Inkhelh thiam vanga hmingthang Maradona chuan, "Ruihhlo ka khawih hian ka hnungtawlh a, footballer tan chuan hmasawn zel a ṭul. Tunah chuan mi thar ka ni tawh," tiin a sawi.

Maradona hian Mexico club a enkawl hma hian Belarus club Dinamo Brest chairman hna a chelh a, hemi atana an mipui hmaa an phochhuahna chu July thla chauh ni mah se tunah chuan Argentina legend hian Mexco-ah inbengbel a tum ta zawk.

Mexico hi Maradona-a'n hand of god a khungna hmun leh World Cup nomawi a chawina a ni a, Barcelona leh Napoli forward hlui hi Dorados ṭantute pawhin an lawm nghal hle.

Dorados fan pakhat chuan, "Diego kan ring che. Kan sel lo che a, kan ngaisang che," tih thuziak a pholang.

Maradona team enkawl tawhte
1994 Mandiyu de Corrientes
1995 Racing Club
2008–2010 Argentina
2011–2012 Al Wasl
2017–2018 Fujairah
2018– Dorados