MPL7-ah goal khungtu thar?

Mizoram Premier League Season 7 chu round 1 khelh zawh a ni tawh a, goal sarih chauh lutin MPL6 round hmasa bera goal lut zat goal 11 nen inthlau mah se mi hriat lar loh goal khungtu thar an chhuah theih a rinawm hle.

Goal khung tawhte

MPL6-ah khan Mizoram Police forward Lalfakzuala chuan goal 10 khungin top scorer a ni a, tun ṭumah pawh Armed Veng tlangval hian goal a khung nghal. Season liam ta khan goal riat khunga pathumna dinhmun hauhtu Ramhlun North striker Lalremruata chu striker chhuak thar tiin a chhal theih. Tuikual North tlangval Remruata hian MPL7-ah chuan champion lai Chhinga Veng tan a inlan tawh a ni.

Chanmari rawlthar Lalnunzama chuan an veng club tan goal pawimawh a khung a, Khelo India best player Zama hi winger-a chhawr ṭhin ni mah se coach Lalruatliana Sailo chuan forward-ah chhawrin a tifuh nghal hle.

Chhinga Vengin season liam taa Chanmari West midfielder Lalromawia an lalut a, Samlukhai tlangval hi kumin Santosh Trophy-ah Mizoram tan number 10 role chelhin match hmasa pahnihah goal li a khung nghal. Chhingcows tana MPL match hmasa berah pawh Romawia hian goal khung nghalin season liam taa West Warriors tana a khung zat a tluk der tawh.

Aizawl FC midfielder Alfred Kemah Jaryan pawh goal nen bul a ṭan a, ani hi MPL4 final-a goal hnih khung thei a ni tih theihnghilh loh a ṭha.

Beiseiawmte

Chhingcows hian season liam taa Under 18 player F. Lalnuntluanga chu senior team-ah an senglut a, Tluanga hian match hmasa berah bul ṭan nghalin goal nawrna pakhat a ni a, MPL U18-a goal riat khunga top scorer a nih avangin hmabak nei êng zinga mi a ni.

Electric Vengin left back anga MPL-a inlar tawh David Lalchhuanawma chu striker-ah an chhawr a, Salem Veng tlangval hian a chakna leh a huaisenna hmangin Aizawl FC defender a chhaih buai pha a, a ke vei lam hian goal a keng tel dawn em tih chu hunin a hril chho ang.

Ramhlun North forward Waheed Adekunle chuan goal khung nghal lo mah se match khat lek aṭangin Nigerian striker hi player naran chunglam tih a lang nghal a, goal a keng tam lo a nih pawhin a chakna leh thiamna vangin defender te awm ti nuam lotu erawh a ni khawp ang.

Ball thar leh a nghawng

MPL7-a thil thar langsar tak awm chu ball thar hman chungchang hi a ni a, Nivia Shining Star aiah Nivia siam chhuah tho Antrix hman a ni a. Ball thar hi a thlawk chak zawk a, ball pet thiam tan ham ṭhatna a siam a, dead ball a hlauhawm sawt dawn tihna a ni a, keeper tan mangchhia tiin a sawi theih ang.

Season tharah goal khung thei zingah ball pet thiam an la tam deuh a nih pawhin a mak lo ang. Round 1-ah Aizawl FC midfielder David Lalrinmuana chuan freekick aṭangin crossbar a pet per a, Chawnpui midfielder Vanlalthanga leh Mizoram Police midfielder Lalramtharmawia ten freekick an pet hlauhawm thei viau bawk.

Electric Veng midfielder Isak Vanlalpeka erawhin freekick

aṭangin goal ropui a khung a, Kolasib freekick pakhat zawk pawh Aizawl FC midfielder Alfred Kemah Jaryan-a'n an lamah a tilut. Chanmari midfielder Lalnuntluanga pawhin a volley goal a, Bawngkawn tlangval hi freekick pet tur pawhin a laktlak viau.

Engtin zel?

MPL hmuhnawmna belhchhahtu R. Malsawmtluanga a la inlan lo zawk a, best player vawi hnih ni tawh MS-a bakah best forward ṭum hnih ni tawh Malsawmfela te, top scorer leh best forward ni tawh MS Dawngliana te an inlan hunah goal a awm belh ngei dawn.

Anni bakah top scorer ni tawh Lalbiakhlua, F. Lalrinpuia leh Laldampuia ten goal khung theih lamah player lar thar tur nen an inel dawn. Aizawl FC foreigner thar pahnih Ghanaian striker Francis Dadzie leh Mali midfielder Amadou Alou Sissoko te an inlan thuai a rinawm a, MPL hmuhnawmna an belhchhah ngei ang.