Southgate a hmanhmawh lo

England coach Gareth Southgate chuan contract thar lamin a rilru a la luah loh thu a sawi a, "Tun dinhmunah chuan ka kuta awm hna hi ṭha taka thawh phawt mai ka duh a ni," tiin a sawi.

Kum 48 mi coach hian kum 1990 hnua a vawi khat nan England chu World Cup semifinal-a luhpui a, a hnathawh ṭhat hi hriain Football Association chief executive Martin Glenn chuan an coach contract hi pawhsei an duh thu a sawi.

Southgate hian tun dinhmunah England tan kum 2020 thleng cham turin contract a nei mek a, kum khatah pound maktaduai 1.8 a hlawh mekah ngaih a ni.

English manager chuan, "Kei chuan tuna ka ngaihtuah ber chu he team hi a ṭha thei ang bera dinchhuah hi a ni tawp mai. Inbiakna chu kan kalpui ṭan ngei a, mahse thla 22 chhung contract dang ka la nei a ni," tiin a tun dinhmunah pawh a la hlim tawk thu a sawi.