FFP zarah European club dinhmun a ṭha
European club-te chu kum 2011 khan an vaia chatna zat belhkhawm chu euro maktaduai 1,700 a ni a, zirchianna hnuhnung berah erawh an hlawkna zat chu euro maktaduai 600 a ni thung.
UEFA president Aleksander Ceferin chuan UEFA Financial Fair Play (FFP) regulations zarah tun hma zawng aiin European football dinhmun a ṭhat thu a sawi.
Zirchianna hnuhnung ber hian December 2017 thleng a huam a, Europe-a first division club 718 zet an zirchiang. A vawi khat nan Europe-a league sang ber club ten hlawkna an hmu an ni.
Financial Fair Play hman a nih ṭantirh hian top division league 54 aṭangin league pariat chauhin hlawkna an nei a, tunah erawh league 29 zetin hlawkna an tel tawh thung.
Football thuneitu sanga thu lawmawm dang leh chu, player hlawh aiin an sum lakluh a pung ṭha zawk.
UEFA president Ceferin chuan, "Tunah chuan hmathlir thar kan neih a ṭul a, kan dan neih sa kan ennawn hian hmasawnna a tichak lehzual ang. Kan dan thar hmang tur hian club-in ba tam tak nei chunga sum nasa tak transfer-a a hmang tur chu a veng lehzual ang a. Hetianga che club an awm a nih chuan UEFA an inrawlh vat dawn a ni," tiin a sawi.
Europe-a thuneitu sang ber hian dan hi an ennawn leh tawh a, dan thar hi 2018-2021 season chhungin an hmang ang.
Europe club-te dinhmun
Kum Hlawkna/Chatna
2008 - €0.6 bn
2009 - €1.2bn
2010 - €1.6 bn
2011 - €1.7 bn
2012 - €1.1 bn
2013 - €0.8 bn
2014 - €0.7 bn
2015 - €0.5 bn
2016 - €0.3 bn
2017 - €0.6 bn