Mitrovic-a 'form' tluang zel

Serbian striker Aleksandar Mitrovic chuan a chet ṭhat a chhawm nung zel a, UEFA Nations League-ah ram tan goal hnih a khung.

Mahse, Fulham striker hian goal hnih a khung chungin a team erawh hnehna a chanpui zo chuang lo a, Romania nen 2-2 in an inhnehtawk.

League C inkhelah Mitrovic hian minute 26-naah goal hmahruai a khung a, mahse Romania midfielder Nicolae Stanciu chuan penalty hmangin a chhanglet.

Mitrovic a awm mai mai lo. Tun season-a Fulham tan match li a inlana goal li khungtu hian mawi zetin an hmahruaina goal a vawi hnih nan a khung a, mahse Romania tan George Tucudean chuan chhanglet lehin point-ah an lungawi a ṭul ta a ni.

League B-ah Turkey-in Sweden lakah goal hniha an hnufual hnuah 3-2 in an lehthal.

World Cup quarterfinalist Sweden hian Isaac Kiese Thelin leh Viktor Claesson te hmangin 2-0 in hma an hruai a, Turkey-in Hakan Calhanoglu hmanga an siphurh an sut ṭhen hnuah Emre Akbaba chuan minute 88-naah siphurh sutin injury time-ah chakna goal a khung leh bawk.