Ronaldo: Engvangin nge Real Valladolid a lei?

Brazil legend, mi tam takin 'The Original Ronaldo' tia an koh kher ṭhin Brazilian striker ropui Ronaldo chuan Real Valladolid-ah neitu nihna 51% ngawt a lei thar a, football khawvel a barakhaih.

Ronaldo hian La Liga club-a neitu nihna 51% nei tur hian pound maktaduai 27 a seng a, September 3 khan Spanish club hi a lei. He club hi La Liga-a budget nei tlem ber an ni a, La Liga kai hlim, second division lama an tlak leh mai pawh rinawm ber an ni.

Heng zawng zawng ngaihtuah hian Ronaldo hian engvangin nge he club hi a lei? tih zawhna chu football ngainatu tam tak thinlungah a piang nghal a, he zawhna hi tun thlengin an la inzawt.

Valladolid kher?

Player langsar ni ṭhin, tun thlenga mi tam tak ngaihven la ni mek Ronaldo hian engvangin nge Real Valladolid kher a lei? tih chu mi tam tak thinlunga zawhna lo piang a ni a, a chhanna awlsam taka pek turin a awm bawk.

June thlenga Valladolid vice president Jose Moro kha Ronal­do ṭhian ṭha a ni a, uaiin sumdawnna lamah an thawk dun. Spanish football expert Balague chuan, "Ronaldo hian Valladolid khawpui hi a hrechiang em em a, he club hian ṭhang zel turin theihna a neiah a ngai bawk.

"Hei mai hi a ni lo. Ronaldo hian Valladolid hi pawisa neih vangin a lei a ni satliah lo. Brazilian FA-ah President nih a duh a, Valladolid-a a tawnhriat neihten a thil tum ti hlawhtling tur hian an puih theih a beisei a ni," a ti.

Sumdawn thiam Ronaldo!

FIFA Player of the Year ṭum thum ngawt ni thei Ronaldo hian khelmual chhunga a thiam leh a ropui tluk zetin sumdawnna pawh a kalpui thiam hle nia sawi a ni a, uaiin lam sumdawnna bakah hian sports marketing company 9INE a kalpui bawk.

9INE-ah hian Ronaldo hian 45% neitu nihna a nei a, UK Company WPP Group chuan 45% tho neitu nihna neiin Brazilian sumdawng hausa Marcus Buaiz chuan 10% neitu nihna a nei ve mek.

BBC Euro Leagues Podcast presenter Mina Rzouki chuan, "Ronaldo a awm tak avangin Valladolid leiba te a kiam ngei dawn a, a rul zo vek tawh hial mai thei. A ṭul hunah club chhungkuaa mi rawn a hreh dawn miah lo a, a theihna chin leh midang rawn hun a hre em em a, hei tak hi sumdawng fing tak a nihna a ni," a ti.

Hlawkna tur

Ronaldo-a'n La Liga club-a share a lei hi a hun hle. Spanish league sang bera thuneitute hian he league hian ngaihven a hlawh theih nan theihtawp an chhuah reng a, tun hnaiah a ṭhang nasa hle bawk.

BBC European football expert Steve Crossman chuan, "Tun dinhmuna Spanish club lei theih chu duhthusam a ni. TV rights lamah sum a pung ve zel bawk a, tun hnaiah kum 15 chhung atan US lam nen league-in inremna an nei bawk.

"North America-a an inkhelh hunah chuan Ronaldo vang ringawt hian Valladolid hian ngaihventu tam tak a neih belh a, hei ringawt pawh hian an sum lakluh a tipung viau ang," a ti.

Sum lam hi...

Arab sumdawng hausa ten club an leiin awihawm loh khawpa tam sum sengin player an seng lut ṭhin a, Ronaldo hian hetianga a tih ve mai ring tam tak an awm. Mahse, hei hi Brazil tana World Cup nomawi vawi hnih chawi thei tih tum a ni lo.

Mahse, Spanish football expert Balague chuan, "Ronaldo a awm tak avangin mi tam takin sum seng nghal a, January transfer-a player lei nghal hum hum turah an ngai a ni mai thei a, mahse chutiang chu a ni lo ang.

"Hriatreng tur chu Ronaldo hian a sumdawnna huang zauh tumin club hi a lei. Club hma­sawnna tur chungchang a sawi ngei a, mahse atthlak taka che chi a ni lo," tiin Ronaldo chuan fimkhur taka hna a thawh tur thu a sawi.

Khawia sum nge?

Ronaldo hian heti zozai sum hi khawi aṭangin nge a neih? tih chu zawhna awm thei a ni. Mahse, tarlan tawh angin Bra­zilian striker hlui hian company pahnih ngawtah share a nei a, Nike brand nen an la thawk dun reng bawk.

A vanglaia Ballon d'Or vawi hnih dawngtu striker hian player a nih lai ringawt khan dollar maktaduai 200-250 inkar vel a lalut hmana ngaih a nih thu Forbes editor Kurt Badenhausen chuan a sawi a, kum 1996 khan Nike nen dollar maktaduai 180 man hu contract an lo ziak daih tawh!

Media ṭhenkhatin Ronaldo sum neih zat hi dollar maktaduai 150 vel niin an pholang a, ṭhenkhatin dollar maktaduai 400 vel a nih thu an tarlang thung - tarlan dan chuan kumin chhung ringawt hian dollar maktaduai 98 vel a lalut tawh.