Mizoram Lockdown (inkharkhip) Ni 106

Chelsea legend, tuna Blues manager ni ta Frank Lampard hian a vanglai khan England tan match 106 a khel hman a, goal 29 ngawt a khungsak. England tana a match hmasa ber hi Belgium lakah October 10, 1999 khan a khel a, friendly match-ah 2-1 in hnehna an chang. August 20, 2003-ah England tana a goal hmasa ber a khung a, 3-1 in Croatia an hneh - England tana vawi 12-a inlanna a ni.

 

Lampard hian Chelsea tan hlawhtlinna tam tak a chhar chungin Three Lions erawh major tournament-ah a champion pui miah lo a, Steven Gerrard, Wayne Rooney, Ashley Cole, Rio Ferdinand, John Terry leh Owen Hargreaves te nena an vanglai innang chho chu 'England golden generation' tia sawi ni mah se beisei angin an hlawhtling thei ta lo a ni. May 29, 2013 khan England tana a goal hnuhnung ber chu Lampard hian Republic of Ireland nena 1-1 a an inhnehtawkna friendly match-ah a khung a, August 26, 2014 khan ram tana inkhelh a chawlhsan thu a puang. Kum 2004 leh 2005 khan England Player of the Year-ah thlan a ni a, kum 2004 khan UEFA European Championship Team of the Tournament-ah a lang phak.