AFCON: Buaina chhuakah mi pariat an thi!
Africa Cup of Nations khelh mekah chanchin lawmawm lo hriat tur a awm a, Cameroon leh Comoros inkhelh hmaa buaina chhuakah mi pariat ngawtin an nunna an chân!
AFCON last 16 inkhelah Cameroon hian 2-1 in hnehna an chang a, quarterfinal an lut. Inelna thlengtu Cameroon tan Karl Toko Ekambi leh Vincent Aboubaka ten goal khat ve ve an khung a, Comoros tana Youssouf M'Changama goal khungin awmzia a nei phak lo.
Mahse, inkhel aia sawi hlawh zawk chu buaina chhuak a ni a, an ram team-in a thiam pariat zingah an hming nem kai mah se Cameroon mipui lawm a kim thei lo - mi pariat an thi a, mi 38-in hliam an tuar.
AFCON last 16 inkhel dangah Gambia chuan rin hlawh zawk Guinea chu 1-0 in an hneh a, Musa Barrow chuan minute 71-naah inkhela goal awmchhun hi a khung.
Buaina chu
Paul Biya stadium, Yaounde-ah Cameroon leh Comoros te chu last 16 match khel tur an ni a, mipui 60,000 lenna stadium-ah hian Covid-19 vangin stadium-a leng zat 80% aia tam luh phal a ni lo.
Mahse, Cameroon inkhel en châk an tam hret a, mi 50,000 velin inkhel en an tum niin match official-te chuan an sawi. Fans sang telin stadium an luh theih loh avangin buaina a chhuak a, an inpawng chil!
He thu buatsaih a nih lai hian mi pariatin nunna an chân phah nia sawi a ni a, mi 38 inhliam zinga pasarih chu an dinhmun a ngaihtuahawm hle niin an sawi - thi zingah hian naupang pakhat a tel bawk.
Danish journalist Buster Emil Kirchner chuan, "Mipuite chu an tlan a, ṭhenkhatin bang an lawn liam a, indaidannate chu an tawn tlang hmiah hmiah mai a ni," a ti a, ticket nei lo tam takin luh luih an tum thu a sawi.
Inkhel danglam
Cameroon-ten last 16 match an khelh hmain buaina chhuak mah se inkhel kaltlangpui a ni a, thihnain an ram titi a luah karah Cameroon-in hnehna an chang - tam tak tan chuan lungtichhetu mai a ni ang.
Comoros hian inkhel pawimawhah an goalkeeper pathum an chhawr thei lo vek a, pahnihin Covid-19 an kai a, pakhat chu hliam vangin chhawr theih loh a ni bawk - left-back Chaker Alhadhur chuan si ban a nghak!
Chu mai a ni lo - minute sarihna lekah captain Nadjim Abdou chu hnawhchhuah a ni a, a rei hmain chak tur a chiang titih der. Minute 29-na lekah Toko Ekambi chuan goal a khung nghal a, minute 70-naah Aboubakar chuan tun inelnaa a goal rukna a khung bawk.
Comoros tan Youssouf M'Changama chuan minute 81-naah freekick mawi bik hmangin si phurh a sut ṭhen a, mahse, hun tawp thlengin goal dang an nei tawh lo a, an tlawm - player kim lo leh si ban nghaka left back hmang chunga an khelh dan erawh fak tlak a tling.
Barakhaih Guinea
Thawhṭanni zana AFCON last 16 inkhel dangah a vawi khat nana AFCON khel Gambia chuan 1-0 in Guinea an barakhaih a, a thiam pariat zingah an tel.
Gambia tan Bologna forward Musa Barrow chuan minute 71-naah inkhela goal awmchhun a khung a, goal aiah red card hmuh tur a tam zawk - minute 87-naah Gambia forward Yusupha Njie chu a yellow card pahnihna avangin hnawhchhuah a ni.
Guinea-in a tam zawk ni chunga si phurh sutna remchang an nei a, mahse, goal ni loin red card bawk an hmu - hun pek belh minute thumnaah defender Ibrahima Conte chu a yellow card pahnihna pek ve a ni a, khelmual a chhuahsan.
Conte hi a goal khung chu offside vanga pawm a ni lo a, a chance duhawm tak a khung lo bawk - a vanneih zan a ni lo. Guinea hian post an tih per bakah Jose Kante hun duhawm tak chu Gambia keeper Baboucarr Gaye chuan ṭha zetin a dang bawk a, quarterfinal-ah a team a hruai thleng.
Last 16
January 24, Thawhṭanni Zan
Guinea 0 - 1 Gambia
GAM: Musa Barrow 71'
Cameroon 2 - 1 Comoros
CAM: Karl Toko Ekambi 29'; Vincent Aboubaka 70'
COM: Youssouf M'Changama 81'
January 25, Thawhlehni Zan
(Result kan hre hman lo)
Senegal 09:30 PM Cape Verde
Morocco 12:30 AM Malawi
Zanin Inkhel Tur
Ivory Coast 09:30 PM Egypt
Mali 12:30 AM Equatorial Guinea