Hyderabad-in East Bengal an sawp

Coach thar Manolo Díaz hnuaia an match hmasa berah East Bengal-in 2-1 in FC Goa hneh mah se match hnihnaah erawh Hyderabad-in 4-0 in an sawp a, an hlim chhung a rei lo.

Hyderabad tan Bartho­lomew Ogbeche chuan hattrick a siam a, Aniket Jadhav chuan goal khat a khung ve bawk. Paris Saint-Germain striker hlui Ogbeche hian tun season ISL-a match 11 a khelh aṭangin goal 12 a khung der tawh!

NorthEast United aṭanga ISL-a bul ṭantu striker hian ISL-ah match 68 aṭangin goal 47 a khung a, assist vawi ruk a nei - a record hi uanpui tham a ni.

Kolkata club tan Lalrinliana Hnamte chu minute 81-naah luhtir a ni a, mahse, hetihlai hian goal li an chhuah tawh avangin Chanmari FC midfielder hlui tan danglamna thlen turin hun a awm tawh lo.

January 24, Thawhṭanni Zan
East Bengal 0 - 4 Hyderabad FC
HYD: Bartholomew Ogbeche 21',
44', 74'; Aniket Jadhav 45+1'
Zanin Inkhel Tur
Bengaluru FC 7:30PM Chennaiyin FC