IPL team thar hming Lucknow Super Giants
Indian Premeir League 2022-ah club thar pahnih Lucknow leh Ahmedabad-ah a awm belh dawn a, nimin khan Lucknow-a innghat tur team chuan an hming atan Lucknow Super Giants a nih tur thu an tichiang.
Nikum October thla tawp khan Dubai-ah IPL club thar tur pahnih lilamna hi neih a ni a, RPSG Group leh CVC Capital Partners ten team pakhat ve ve an chang. Lucknow Super Giants neitu hi RPSG an ni a, IPL-a club nei tura an sum sen zat hi cheng vaibelchhe 7,090 a ni a, dollar maktaduai 930 (£675.2m) a ni pha daih. CVC Capital hian Ahmedabad-a innghat tur team pakhat dang chang tur hian cheng vaibelchhe 5,625 an seng ve bawk a, dollar maktadai 690 (£501m) lawih a ni.
IPL-ah hian team pariat Chennai Super Kings, Delhi Capitals, Kolkata Knight Riders, Mumbai Indians, Punjab Kings, Rajasthan Royals, Royal Challengers Bangalore leh Sunrisers Hyderabad te an awm sa a, Lucknow Super Giants leh Ahmedabad ten an belh dawn.
Team 10 an awm dawn tak avangin season khata match 60 awm ṭhin chu match 74-ah a pung chho dawn a, inkhelh dan kalphung erawh group stage leh playoff a la ni reng ang.
Nikum khan team 10-te hian an player chelh tur (pali chin a chelh theih) an tichiang tawh. Team thar pahnihin IPL club dang chelh lo player aṭangin player thar pathum ve ve an lalut thei a, team pahnih hian an tifel ve ve tawh.
Lucknow Super Giants hian KL Rahul, Marcus Stoinis leh Ravi Bishnoi te an la a, KL Rahul hian captain hna a chelh ang. Ahmedabad hian Hardik Pandya, Rashid Khan leh Shubman Gill te an la thung.
Thla thar hian player auction a awm dawn a, hemi atan hian player 1,214 ten hming an ziaklut tawh. IPL-ah hian champion lai chu Chennai Super Kings an ni a, MS Dhoni hote hian nikum October thla khan Kolkata Knight Riders hnehin nomawi an chawi a ni.
Club Players
Chennai Super Kings Ravindra Jadeja, MS Dhoni, Moeen Ali, Ruturaj Gaikwad
Delhi Capitals Rishabh Pant, Axar Patel, Prithvi Shaw, Anrich Nortje
Kolkata Knight Riders Andre Russell, Varun Chakravarthy, Venkatesh Iyer, Sunil Narine
Mumbai Indians Rohit Sharma, Jasprit Bumrah, Suryakumar Yadav, Kieron Pollard
Punjab Kings Mayank Agarwal, Arshdeep Singh
Rajasthan Royals Sanju Samson, Jos Buttler, Yashasvi Jaiswal
Royal Challengers Bangalore Virat Kohli, Glenn Maxwell, Mohammed Siraj
Sunrisers Hyderabad Kane Williamson, Abdul Samad, Umran Malik
Lucknow Super Giants* KL Rahul, Marcus Stoinis, Ravi Bishnoi
Ahmedabad-based team* Hardik Pandya, Rashid Khan, Shubman Gill