International Break - Eng chhawlh ber nge ni ta?

Tunkar tawpah international break a awm dawn avangin Premier League khelh a ni dawn lo a, amaherawhchu Europe ramte an inkhel dawn lo. FIFA-in international break a siam chhan chu nikum lama Covid-19 vanga South Africa leh Asia ramte inkhelh theih loh ṭhenkhat hnawhkhah nan a ni.

Engtin maw?
Kumin kum tawp hian Qatar-ah World Cup khelh a ni dawn a, qualifier khelh zawh a la ni lo. South American Football Confederation (CONMEBOL) leh Asia Football Confeneration (AFC) ten tun ṭum international break hi an hmang ṭangkai ang.

International break hian January 24 aṭanga February 2, 2022 thleng a awh dawn. South America ramten qualifier match hnih ṭheuh an khel thei dawn a, March thlaah match hnih dang khel lehin World Cup khel tur an chingfel thei tawh ang.

Asia ramah team 12-in World Cup qualifier third round an khel mek a, heng team 12 te hian tun international break-ah match hnih ṭheuh an khel dawn. South America leh Europe ram ang thoin March thla tawpah match hnih dang an khelh leh a ṭul dawn a ni.

Premier League lam hi...
Premier League lamin official-in winter break chu puang chiah lo mah se thlasik chawlh chu a ni berah a ngaih theih. Club ṭhenkhat tan chanchin lawmawm a ni a, January transfer-ah an insawrbing thei ang.

Chutihrualin club ṭhenkhat chuan an player-te ram aiawha khel turin an chân thei bawk. Brazilian manager Tite-a'n Liverpool forward Roberto Firmino ko lo mah se Alisson leh Fabinho te a ko a, Japan squad-ah Takumi Minamino a tel bawk.

Reds player zingah Mohamed Salah, Sadio Mane leh Naby Keita ten AFCON an khel mek. Manchester United player zingah Fred, Alex Telles (Brazil ve ve) leh Edinson Cavani (Uruguay) te ram aiawha khel turin an ko a, Chelsea defender Thiago Silva pawh ram tana khel tur zingah a tel.

Chutihrualin Chelsea tan international break hi thawk lak nan a pawimawh hle. European champion Blues hian February thla hian Premier League bakah FIFA Club World Cup, Champions League leh League Cup final te an khel dawn a, tuna an chawlh neih hi inpuahchahna hun ṭha a ni thei ang.