Frank-a'n contract a pawtsei

Premier League club Brentford chuan an manager Thomas Frank chu contract thar an ziahpui a, kum 2024-25 season tawp thleng atan inremna an ziak thar - a lakah rinna an la nghat sang hle tihna a ni.

Frank hian season hmasa khan Bees hi Cham­pionship aṭangin Premier League-ah a kaisan­pui, kum 74 hnuah English football inelna sang berah a hlangkai a, a hna thawhah club thuneitu an lawm; a assis­tant Brian Riemer pawhin kum 2025 thleng daih contract a ziak ve bawk.

Brentford director of football Phil Giles chuan, "Brentford hi hma lam pan kalpui zel kan duh. Club lian dangte nen inelna, inkhel hmuhnawp chhawp chhuak turin Thomas leh Brain chungah rinna sang tak kan nghat, kan beisei aia sang min thlenpui leh ngei kan ring," a ti.

Kum 48 mi Frank chuan, "Brentford nen thawnthu ngaihnawm kan ziak a, kan thil tih ṭhenkhat hi chu kumkhua atan chhinchhiah a ni ve tawh ngei ang. Sulhnu ropui neih belh kan duh, chumi atan min ring ngam hi ka lawm," tiin a sawi.

EPL season ṭan niah khan Bees hian Arsenal 2-0 in an hneh, league match 23 an khelh tawh aṭanga point 23 hmuin 14-na dinhmun an luah mek.