Harsa takin Nadal a tlang hram

Nuamsa taka tlang tur angin a lang hman a, mahse a tak takah erawh thil a harsa hle. Rafael Nadal chuan set nga an khelh hnuah Denis Shapovalov hnehin Australian Open semifinal a in vaw kai hram.

Nimin Rod Laver Arena-a inkhelah player pahnih an inkhel tawk hle, darkar li leh minute riat an inkhelh hnuah seeded parukna Nadal hi 6-3, 6-4, 4-6, 3-6, 6-3 in a chak a, a vawi hnih nan Australian Open nomawi chawi a tumna a la nung zel.

Nadal hian semifinal-ah chuan Matteo Berrettini leh Gael Monfils inkhela chak zawk a hmachhawn leh ang.

Inkhel chu
Nipui boruakin Melbourne Park a chiah hneh a, khua a lum huam huam a ni ber mai. Tawnhriat nei ṭha Nadal-a'n service hloh miah loin set hmasa pahnih a la thei, harsa leh thahrui sen hnem ngai lutuk loin a tlang dawn niin a lang hman.

Mahse, rin ang ngawtin thil a kal bik lo. Set thumnaah Nadal-a'n a vawi khat nan service a hloh a, set a hloh nghal bawk. Set linaah pawh Shapovalov-a'n game lina lekah a khingpui service chhuhsak lehin hma a hruai fal a, rei lote chhungin set hnih ve ve an la fel der.

Canadian tlangval Shapovalov-a ball vuak a na a, a boruak a fuh laklawh bawk. Amaherawhchu, set hnuhnung berah Nadal-a'n a zia a chhuah, inkhel kal lai a timuang lui hret a, service hmasa ber hloh thei dinhmuna a din hnuah a inchhanhim.

Spanish star hian game hnihnaah Shapovalov-a service a chhuhsak ta zawk a, a chetsual duh tawh loh avangin a tawpah a dingchang. Inkhel boruak sang leh hun pawimawh laiah tawnhriat nei ṭha zawk a nihna a chhawr ṭangkai.

A harsa takzet
Hnehna a chan hnuah Nadal chuan, "Khaw lum lam kha 30C te a ni a, a lumin a uap hle. Khatianga inkhelh kha chu a awlsam lo, set thumnaah khan chak tlang theihna remchang ka neih ka chhawr thei lo kha ka tuar ve bawk.

"Denis ang player ṭha hmachhawn chu a hautak hle, taksa leh rilru a chau. Kum 21 mi ka ni tawh lo, hahchawlh ka mamawh. Semifinal khelh hmain ni hnih chhung chawlhna hun ka nei thei tur hi ka lawm," a ti, kum 35 mi a ni tawh.

Roger Federer leh Novak Djokovic te khumin Grand Slam champion hnem ber nih theihna remchang a nei mek a, chumi tihlawhtling tur chuan Nadal tan match hnih chak chauh a ngai tawh - a ban phak maiah nomawi a awm tawh tihna a ni.

Grand Slam vawi 20 champion tawh Nadal chuan, "Hmanni lawk kha chuan Australian Open hi kan khel thei ang em, tih a chiang lo. Tunah erawh semifinal hial kan thleng ta si, a pawimawh ber zawk chu nuamti taka tennis khelh theih a ni," a ti.

Tsitsipas a tlang
Thawhṭanni zan khan fourth round khelh zawh a ni a, inkhel inhnehtawk leh hmuhnawm takah Stefanos Tsitsipas chuan Taylor Fritz hnehin quarterfinal a lut a, vawiin hian Jannik Sinner nen semifinal hmunruak an inchuh leh dawn.

Greek tlangval hi seeded palina a ni phak a, a lakah pawh beiseina neih san tur a ni. Mahse, American star Taylor a ṭang thei hle, set nga an khelh hnuah Tsitsipas-a'n 4-6, 6-4, 4-6, 6-3, 6-4 in hnehna a chang hram. Inkhel dangah Sinner-a'n Alex de Minaur 7-6 (7-3), 6-3, 6-4 in a hneh ve bawk.

World number 4 Tsitsipas hi nikum November thla khan a kiu dinglam zai a ni a, tunah chuan ngai a awh leh tawh. Tun Australian Open khelh laiah hian a match hmasa berah straight set hmanga a chak bak chu harsa tak hlirin a la chak.

Kum 23 mi chauh a la nih avangin Tsitsipas hian thahrui a ngah, zan khat lek hnuah pawh tha tharin a khel leh thei mai ṭhin. Chutihrualin quarterfinal-ah pawh set nga a khel leh a nih chuan, a tlang a nih pawhin semifinal leh final-ah a chau tawngkhawng thei.

Ashleigh Barty a kal fawr
Hmeichhe tennis world number 1 Ashleigh Barty chu Australian Open khelh laiah a kal fawr hle. Seeded pakhatna hian nimin tlai khan Jessica Pegula chu 6-2, 6-0 a sawpin semifinal a lut - a service a hloh miah lo a ni.

Tualchhung nula Barty hian tun inelna neih laiah match nga khel tawhin set a la hloh lo, a khingpuite hi tie break pawh a la khelhpui ngai lo. A hmaa ding apiang chu harsa lo takin a nek chhuak hmiah hmiah a ni ber.

Kum 25 mi Barty chuan, "Beisei aia ṭhain ka khel. A nihna takah chuan Melbourne khawpui ni loin ka chenna Brisbane ang mai a ni, nilengin khua a lumin a sa em em. Ka tan chuan chhun a ni emaw zan emaw pawh ni se Australian Open a nih chuan buaina a awm lo," a ti.

Barty hian French Open leh Wimbeldon title a la tawh, an rama khelh Australian Open bikah chuan tun ṭum hi semifinal a thlen vawi hnihna a ni. An ramah a vawi khat nana final luh a tum a, nomawi chawi nghal a tum ngei ang.