Remsiami telna India-in semifinal lut

India nula hockey khel thiamte chuan Women's Asia Cup khelh laiah semifinal an in hlangkai, zanin dar 6:00 hian South Korea nen final luh an inchuh leh nghal dawn. Semifinal lehlamah a thlengtu Japan leh China an inkhel ve thung ang.

Thawhṭanni zan khan India hian an pool match hnuhnung ber an khel a, tlang tura chak an ngaihna inkhelah Singapore 9-1 in an sawp. Tun ṭumah hian Lalremsiami Hmar-in goal a khung lo a, an match hmasa lamah chuan a lo khung tawh thung a ni.

India tan Gurjit Kaur-i'n hattrick a siam a, Manika leh Jyoti ten goal hnih ve ve an khung bakah Vandana Katariya leh Mariana Kujur ten goal khat ve ve khung bawkin, nuamsa takin hnehna an chang.

Group stage paltlanga semifinal luh hi thil lawmawm a ni; tlang a lawmawm tluk zetin Hockey World Cup khelh theihna ticket an nei tel nghal a, India tan chuan lungte pakhata sava pahnih vawm thlak ang a ni.

Asia Cup an khelh hnuhnung berah khan India hi an champion. Final-ah a thlengtu Japan an hneh, inkhel hriatreng hlawh takah Mizo nula Remsiami'n goal a khung a nih kha. Kuminah pawh ram pahnih hi an chak a nih chuan final-ah an intawng leh thei dawn.

Tokyo Olympic-a inlan tawh Remsiami chuan, "Mimal ang takin ka khel ṭha tawk lo a ni mai thei, a pawimawh ber team-in hnehna kan chan avangin ka lawm. Kan khelh hmabak lo awm turah theihtawp kan chhuah zel ang," tiin Vanglaini a hrilh.