Watford-in Ranieri an bân

Premier League club talbuai Watford chuan thla li pawh a liam hmain coach Claudio Ranieri an bân a, October 4-a an lakluh coach hian match 14 bak a kaihruai hman lo.

Kum 70 mi coach hian Premier League bikah chuan Watford hi match 13 kaihruaiin, point sarih lek a hlawhchhuahpui a, kar hmasa lawka 3-0 a Norwich City an ngam loh hnuah bân a ni ta a ni.

Watford chuan, "Hornets (Watford sawina) board chuan Ranieri hi pa lang tlang leh zahawm tak a ni tih a hria a, zahawm taka he team a lo kaihhruai tawhna avangin Vicarage Road-ah chuan zah a ni reng tawh ang.

"Mahse, board chuan Premier League season chanve deuhthaw a la awm lai hian inthlak danglam a ṭulin a hria a, kan squad duhawm tak hmanga English top flight league-a kan inhamtan theih nan coach thar tan hun tam zawk a awm theih phah dawn a ni," an ti.

Watford hi Norwich laka an tlawm khan relegation zone-ah an tla thla a, match 38 khelh tur awmah match 20 an khel tawh. Kum 2012-a Pozzo chhungkuain Watford an lei hnuah tun hi manager thar vawi 15 an neihna tur a ni.