Martial-a'n Sevilla a pan dawn

Manchester United leh Sevilla chuan Anthony Martial chungchangah inremna an nei a, Spanish club hian tun season khelh hmabak atan French forward hi loan hmangin an la dawn.

Sevilla hian Martial chhawr theih nan hian loan fee atan dollar maktaduai 5 (€6m) leh a hlawh kar khata £150,000 pek an huam niin an sawi.

Man United-in kartawpa West Ham an hneh ṭum khan Martial hi bench aṭanga lutin Marcus Rashford-a'n chakna goal a khung theih nan hna ṭha tak a thawk. Tunah erawh Spanish club leh English club ten inremna an nei tawh a, he thu i chhiar meuh chuan Martial hi Sevilla player a ni tawh hial ang.

Martial-a agent Philippe Lamboley chuan nikum December 10 khan Old Trafford chhuahsan a duh thu hi a lo sawi tawh a, manager lailawk Ralf Rangnick pawhin tun thla khan France international forward hi match day squad-a a awm duh loh thu a sawi. Amaherawhchu Martial hian German manager-in a chungchang a sawi chu thu dik lo a nih thu a sawi thung.

French forward hian tun season-ah league match vawi riat chiah a la khel a, goal khat chiah a la khung. Man United tan season sarih chhungin Premier League match 175 a khel tawh a, goal 56 a khungsak tawh.

Hetihlai hian Newcastle United pawhin Man United tana khelhna hmun changpha lo Jesse Lingard chu loan hmanga lak tumin ṭan an khawh mek a, English midfielder hi season tawp ruala a contract zo tawh tur a nih avangin Man United hian a ngheta chhuahtir dan an zawng thung.