Everton-in Vitor Pereira an hnimhnai

Premier League club Everton chuan Rafael Benitez an bân hnuah an coach tur an zawn chhunzawm zel a, club neitu Farhad Moshiri chuan Vitor Pereira lakluh a duh nia sawi a ni - he thuziak i chhiar meuh chuan an inlalut fel tawh hial mai thei.

Portuguese coach hi December thla khan Turkish club ṭha Fenerbahce chuan a hna aṭangin an chawlhtir a, hemi hnuah hian club enkawl a nei leh tawh lo. Heti chung hian hian club neitu Moshiri lung a len tlat!

Derby County manager leh Everton striker hlui Wayne Rooney chu biak langsar zinga mi a ni a, Chelsea legend Frank Lampard chu inbiakna neihpui a ni bawk. Mahse, Vitor Pereira hi Merseyside club enkawl tura dinhmun ṭha ber a ni rih.

Belgium coach leh Everton boss hlui Roberto Martinez chu a tirah biak a ni a, mahse, Spanish manager hi Belgian national team lamin chhuah an phal lo - World Cup kum a ni tlat.

Kum 53 mi Pereira hian Portuguese club ṭha Porto pawh a lo enkawl tawh a, league-ah vawi hnih a champion pui thei. Greek club langsar Olympiakos chu 2014-15 season khan league leh Greek Football Cup-ah a champion pui bawk.

Mahse, kum 2017 khan German second division club 1860 Munich chu thla nga chiah a enkawl chhungin a relegate pui a, December 2017 khan Chinese Super League club Shanghai SIPG a zawm.

Shanghai SIPG hi CSL leh Chinese FA Super Cup-ah a champion pui a, July 2021 khan 2015-16 a a lo enkawl tawh Fenerbahçe a zawm. Turkish club hian December khan a hna aṭangin an bân zui a, hemi hnuah hian club a nei leh tawh lo.

Everton hian Premier League-a match 20 khelh tawhah vawi nga chiah hnehna an chang a, vawi li draw result neiin vawi 11 an tlawm a, English football-a tawnhriat nei lo Pereira tan hna a awlsam lo ang.

Khawthlang media-ten an tarlan dan chuan Everton hian Pereira an lalut a nih chuan tun season atan bak contract an ziahpui dawn lo a, a ṭul dan a zira contract tihtawp dan ziah tel a ni dawn bawk.