Celtic coach hlui Wim Jansen a thi

Scottish Premiership club lar Celtic lo enkawl tawhtu Wim Jansen chu kum 75 mi niin a thi a, player a nih laia Netherlands tana vawi 65 inlan thei Jansen hian hun rei tak chhung chu dementia (hriatna hloh) a lo vei tawh a ni.

Jansen hian 1997-98 season chiah kha Celtic a enkawl a, mahse, Celtic hmelma kumhlun Rangers-in season sawm chhung a zawna league nomawi an chawi tur titawptu a nih avangin ngaihsan a hlawh hle.

Player a nih laia Feyenoord tana nomawi chawi theih ang chawi kimtu Jansen hian kum 1970 khan European Cup nomawi hial a chawi a, final-ah Celtic an hneh.

Ajax tana a khelh laia league nomawi pawh lo chawi tawh Jansen hian player a nih laia a velh Celtic chu manager a hnih hnuah a hlawhtlinpui a, league-a a champion pui bakah Scottish League Cup-ah nomawi a chawipui a, Celtic legend Henrik Larsson laluttu a ni bawk.

Celtic manager Ange Postecoglou chuan, "Kan career-a Celtic-a hun hmanna chance kan nei hi kan vannei a, kan tum ber chu sulhnu ropui hnutchhiah a ni bawk - ani chuan chu chu thla 12 chhung lekin a ti thei a ni," a ti a, Jansen a thlah.

Coach a nih hnu pawha Feyenoord tana Dutch Cup vawi hnih chawitu hi a club hlui chuan, "Mi danglam bik leh Feyenoord player ropui a ni," tiin an thlah ve bawk - Netherlands tan World Cup-a final an luh vawi hnihah a tel ve ve a, mahse, 1974 leh 78-ah te final-ah an chak zo lo.

Dementia hi hriatna hloh tiin a sawifiah thei a, footballer hluiten dementia an neih nasat chhan hi ball ruh an tauh nasat vang a ni ber a, ball tauh nasat hian 'Neurodegenerative brain' natna avanga thihna thlengin a thlen thei.

'Neurodegenerative brain' hi 'central nervous system' (thluak leh spinal cord, kan taksa leh rilru 'control tu) an tiha cell-te an lo chhiat emaw cell thi a lo awma natna thleng thei a ni a, Alzheimer leh Parkinson kan tihte hi a natna lanchhuahna langsar an ni.

July 2021 khan English football-ah ball tauh theih zat dan siam thar a lo ni tawh a, footballer-te chu training-naah kar khat chhungin 'higher force' hmanga ball kal reng reng vawi 10 aia tam tauh phal a ni lo.

Football-a ball kal, 'higher force' tia an sawi hi long ball (35 meter aia thui), cross, corner leh free kick aṭanga ball kalte hi a ni a, chumi awmzia chu hetiang ang aṭanga ball kal reng reng chu player-ten kar khat chhungin training-naah vawi 10 aia tam an tauh a thiang lo tihna a ni.