Watford-in manager atan Roy Hodgson an la

Watford-in Claudio Ranieri thlak nan English manager Roy Hodgson an la. England leh Liverpool manager hlui hi kum 74 mi a ni tawh a, season liam ta khan Crystal Palace a enkawl. Hornets hian match 20 aṭangin point 14 chauh an hmu a, table-ah 19-naah an awm avangin Hodgson hmabak a ko hle.

Manager thlak ngun
Watford hian season liam ta khan Championship an la khel a, Vladimir Ivic hoin season bul an ṭan. December 2020-ah Vladimir Ivic hi an ban a, Xisco lalutin Spanish manager hnuaiah pahnihna niin Premier League khel turin an tling.

Premier League-ah beisei anga bul an ṭan ṭha lo a, nikum October 3 khan Xisco hi an ban. Hornets-in beiseina sang tak nen Leicester City champion puitu Claudio Ranieri an lalut a, Italian manager hnuaiah beisei ang result ṭha an nei lo.

Ranieri hnuaiah hian Watford-in match 13 an khel a, ṭum hnih chauh chakin vawi khat an inhnehtawk. Point 39 hmuh theih aṭangin point sarih chauh an hmu a, tla thei dinhmunah an ding hial.

Watford hian tun hnaiah chauh manager hi an thlak ngun lo a, kum 2012-a Pozzo chhungkuain club neitu nihna an neih hnuah tun hi manager 15 an thlakna a ni.

Hodgson hmabak
Roy Hodgson hi kum 2002 leh 2005-a Watford enkawl tawhtu Ray Lewington-a'n a pui dawn a, England leh Crystal Palace a enkawl ṭumah pawh Lewington hian a pui tawh.

Watford hian Hodgson-a contract rei zawng an tarlang lo a, chutihrualin a hna tur erawh a chiang. English manager hian Hornets hi Premier League-a inhamtan dan a zawnpui dawn. An elpui tur hi sum ngah vanga khawvelin an ngaihven Newcastle United bakah Norwich City, Everton leh Leeds United te an nih dawn avangin hna hi a awlsam lo ang.

Hodgson erawh football khawvelah a mikhual lo a, ram hrang hrang pariatah team enkawl tawhin Watford hi team 17 a enkawlna a ni. Premier League bikah Hodgson hian Blackburn Rovers, Fulham, Liverpool, West Brom leh Crystal Palace te a enkawl tawh a, win percentage 30 chunglam vek a nei phak.