Bayern Munich: Nagelsmann leh Flick te khaikhinna

Bayern Munich-in Hansi Flick-a hnuaia season khat leh a chanve chhung lekin nomawi pasarih an chawi a, an hlawhtling hle. Tun season aṭangin Julian Nagelsmann-a'n Bavarians a enkawl ṭan a, Flick-a hmunruak a luah khat zo dawn em tih chu hunin a hril ang.

Flick-a leh Bayern
Flick-a'n Bayern a enkawl ṭan kha November 2019 a ni a, Bundesliga-ah palinaah an awm mek. Match hmasa berah Borussia Dortmund 4-0 in sawp mah se December thlaah pasarihnaah an awm.

Amaherawhchu Flick-a enkawl Bayern hian league match hnuhnung 20-ah vawi khat an inhnehtawk tih loh chu an chak vek. Champions League leh DFB Pokal-ah hnehna an channg vek bawk a, an club history-a a vawi hnih nan an treble champion.

Flick-a hnuaiah season tluana an khelh chu season khat chauh a ni a, match thum dah bang chungin Bundesliga-ah an champion. Amaherawhchu Champions League-ah awlsam takin group stage an paltlang hnuin PSG hneh loin quarterfinal-ah an tla a, an chhuanvawr Robert Lewandowski a tel lo. DFB Pokal-ah second round lekah Holstein Kiel lakah an vanduai bawk.

Nagelsmann ve thung
Julian Nagelsmann hnuaia Bayern khelh dan hi Flick-a season tluana a enkawl ṭum bul ṭanna nen a inang hle. Bayern-in awlsam takin Champions League group stage an paltlang a, Bundesliga-ah pawh hmahruaitu ni bawk mah se DFB Pokal-ah Borussia Monchengladbach hneh loin an tla. An chak lohna hi 5-0 ngawt a ni.

Amaherawhchu Nagelsmann hi Covid-19 positive vangin match li team a ho thei lo a, chung zingah chuan Gladbach nena an inkhelhna hi a tel. Bavarians hian Nagelsmann hnuaia nomawi chawi theih hmasa ber DFL Supercup erawh an chawi thung.

Khaikhinna chu
Bayern hian Flick-a hnuaiah an goal bawh a na a, Nagelsmann-a hnuaiah an chhunzawm leh bawk. Striker ṭha sa Robert Lewandowski-a'n a vanglai hun a hmang a, Bayern an vul tel bawk.

Flick-a enkawlna hnuaiah Lewy hian match 71-ah goal 83 tehmeuh a khung a, Bayern-in match 86-ah goal 260 an khung. Match tinah 3.02 goals khung ang an ni a, match 31-ah goal li emaw a aia tam an khung. Bayern hian Flick-a hnuaiah match khat chiah goal khung loh an nei a, mak tak maiin an goal khung loh hi Nagelsmann-a enkawl RB Leipzig lakah niin 0-0 in an inhnehtawk.

Nagelsmann-a hnuaiah hian match 29 chauh an la khel chungin goal 102 an khung tling der tawh a, match tina 3.52 goals khung ang an ni. Goal khung lohna match vawi khat chiah an nei a, hei hi DFB Pokal-a Gladbach 5-0 a an hneh loh ṭum a ni a, technical area-ah Nagelsmann a awm lo.

Bayern-in sawiselna an tawhna ṭhin erawh goal venhim kawngah a ni a, Bavarians hi an goal bawh a nat avangin an tlarhnung lam pawh a pawp fo. Flick hnuaiah hian Bayern-in match tinah 1.06 goals chhuah ang an ni a, Pep Guardiola leh Carlo Ancelotti te enkawl khan 0.8 goals leh 0.9 goals chhuah ang an ni thung.

Nagelsmann-a'n tlarhnung hi siamṭhat a tum a, tun dinhmunah goal 25 chhuah tawhin match tina 0.97 chhuah ang an ni a, hma sawn hret mah se hmasawnna a tam lo hle.

Khelh dan phung
Flick-a hnuaiah Bayern-in 4-2-3-1 formation an hmang a, Germany-ah chuan he formation hian hmun pawimawh tak a chang. Joachim Low hnuaia Flick-a'n assistant coach hna a chelh lai pawh khan 4-2-3-1 formation hi hman a ni a, kum 2014-a FIFA World Cup nomawi an chawi pawh khan 4-2-3-1 formation hi an hmang.

Flick-a hnuaia Bayern-in match 86 an khelhah 4-2-3-1 formation hman loh hi ṭum hnih chauh an nei a, heng inkhel pahnihah hian defender pathum an hmang.

Bayern hian Flick-a hnuaiah inkhel an thunun a, chawhrualin 60.2 % ball chang ang an ni a, match tinah 570 pass an nei. Mual sir aṭangin an goal bawh a na a, wing back ten overlapping an lak ṭhat bakah winger aṭangin ball vawrhluh a tam. Season liam ta khan Lewy ringawtin league bikah ṭum nga a tauh goal.

Flick-a team-te hi an tlan tam avangin fak an hlawh a, match khatah chawlhrualin 114.6 km an tlan pha. Amaherawhchu Nagelsmann-a hnuaiah hma an sawn leh hret a, chawhrualin 115.9 km an tlan.

Ball chan tam kawngah erawh 60.1% ah tla hret mah se match tinah 615 an pass pha a, ball pass an ngah zawk. Kum 34 mi Nagelsmann hian Hoffenheim leh RB Leipzig a enkawl lai ang thoin an khelh dan hmang a thlak nasa.

Nagelsmann hnuaiah 4-2-3-1 formation an hmang nasa a, defence pathum ṭum li an hmang tawh. An danglamna tak erawh khelh dan hmang an thlak nasa, defender pali hmang chung sia inkhelh laia pathuma sawn pawh an ngah. Mual vei lamah Leroy Sane a chhawr a, Sane hian mual laiah Thomas Muller a pui fo bawk.

Bayern-in Nagelsmann hnuaiah hma an sawn a, amaherawhchu Flick a tluk pha em tih erawh a nomawi chawi zat aṭanga teh a ni thung ang. Kum 34 mi Nagelsmann hian Bayern a enkawl hmain nomawi a la chawi ngai lo a, stage sangah a theihna tak tak phochhuah a la mamawh a ni.