Tuten nge Asia aṭangin World Cup khel dawn?

Asia ram aṭanga FIFA World Cup 2022 khel tur zawnna chu vawiinah chhunzawm a ni dawn. Group A-ah Iran leh South Korea te dinhmun a ṭha. Iran hian zanin dar 8:00 hian Iraq an hmachhawn ang a, tlai dar 5:30-ah South Korea-in Lebanon an hmachhawn bawk ang. Group B aṭanga tling tur hriatthiam a la har. Tlai dar 2:40-ah Australia-in Vietnam an hmachhawn ang a, dar 3:30-ah Japan leh China an inkhel ang a, zan dar 10:45-ah Saudi Arabia leh Oman te an inkhel bawk ang.

Tling tur zat?
Asia hian quota 4.5 an nei a, group hnih aṭang hian team pahnih ve ve an tling dawn. Pathumna ve ve hian playoff khel tur an zawng leh dawn. Asia ram aṭanga playoff khel tur hian South America aṭanga pangana an hmachhawn dawn a, playoff hmanga Qatar khel tur zawn a harsa dawn.

Team tinin match li ṭheuh khelh tur an la nei a, group A-ah Iran-in zanina an mikhual tur Iraq an hneh thei a nih chuan Asia aṭanga World Cup khel tura tling hmasa ber an ni ang. South Korea pawh an dinhmun a ṭha a, point 14 an hmu tawh. Taegeuk Warriors hian tun ṭum international break-ah Lebanon bakah Syria an hmachhawn dawn a, hnehna an chan ve ve chuan kum tawpah Qatar an zin thei ang.

Japan nge Australia?
Group B-ah team ṭha pathum Saudi Arabia, Japan leh Australia te an intluk tawk hle. Saudi Arabia-in point 16 an hmuh tawh avangin Qatar zin turin an dinhmun a ṭha a, chutihrualin Oman an hmachhawn zawh hian February 1, Thawhlehniah Japan nen an inkhel dawn. The Green Falcons hian vawiina Oman an hneh a, an elpui Japan an hneh leh chuan WorldCup khel turin an tling ang.

Point 12 hmu tawh Japan leh an hnuaia chiaha awm Australia (11 pts) ten hmunruak pakhat hi an inchuh turah a ngaih theih. Australia hian vawiin chawhnua Vietnam an hmachhawn zawh hian February 1-ah Oman nen an inkhel leh dawn. Chutihrualin Aussies tana inkhel pawimawh tur chu March thla tawpah a ni dawn a, an elpui Japan leh Saudi Arabia te an la hmachhawn dawn a ni.