Eriksen-a'n Ajax training a zawm

Denmark midfielder Christian Eriksen-a'n football khelh leh ngei tumin theihtawp a chhuah a, a football nun bul a ṭanna Ajax-ah a taksa ti fit turin training a zawm - season chawhnu lamah chuan a inkhel kan hmu leh dawn niin a lang.

Euro 2020-ah khan Eriksen hi inkhelh laklawh laiin a tlu, a thawkna pui turin khawl a hman a ngai tawh - Italy ramah chuan a inkhelh ve an phal tawh lo. Inter Milan nen inhriathiam tawnnain a contract an titawp.

Kum 29 mi Eriksen hian Ajax tan tun hmain season nga chhung a lo khel tawh, 2013 khan Tottenham zawmin a hnuah Inter Milan tan a khel. Tunah chuan Premier League club Brentford nen sawi zawm mek a ni.

Denmark tana match 109 khel tawh Eriksen chuan, "Ajax-ah hian hmelhriat ka ngah, min ngainatu an tam bakah hun rei tak ka lo hman tawhna a nih avangin mahni ina haw ang mai ka ni. Kan tan chuan Jong Ajax hi a bul ṭanna duhthusam a la ni reng.

"Ṭha taka inkhelh leh thuai ka duh, a rang thei ang berin tun hma lama ka khelh ang khan khelh leh theih ka beisei," tiin khelmual chhunga luh leh theih ngei a beisei thu a sawi.