Covid-19 vangin inelna hun sawn

Mizoram sorkar chuan January 25, Thawhlehni khan Covid-19 hri kai pung an tam zel avangin infiamna leh a kaihhnawih SOP hman lai mek chungchangah thuchhuah thar a siam a, sports practice leh sports inelna buatsaih a khap. Sorkar thuchhuak avang hian inelna kalpui mekte pawh chawlh lailawk a ni.

Veteran Football

GIG Veteran Football Tournament, G90s ten February 8, 2022 aṭanga khelh ṭan tura kan ruahman chu sorkarin inkaihhruaina dan a siam tharah tournament siam phal a nih loh avangin sawn hlat a ni.

Sorkar SOP-in siam a phal hunah GIG Veteran Football Tournament hi siam ngei tum a ni a, chutihrualin inelna kalpui theih a nih rih loh avangin Entry Fee lo pe tawhte pawh pek let an ni ang.

Futsal Inelna
Mizoram Football Association hnuaia MFA Futsal Committee chuan February 2022-ah inelna hrang hrang MFA Futsal League, Division One Tournament, Veteran Tournament leh Women's Tournament te buatsaih tumin hma la vek tawh mah se Covid-19 hri darh zel vangin an hnuaia futsal club hnenah tun dinhmunah inelna an buatsaih theih dawn loh thu an hriattir.

MBBA Div II & III Screening
MBBA Division II leh III Screening tournament chu January 24 aṭang khan Hawla Indoor Stadium, Republic Vengthlangah an khel ṭan. Amaherawhchu sorkarin SOP thar an tihchhuah avangin MBBA-in inelna an chawlh rih tur thu an puang a, inelna kalpui theih a nih hunah fixtures hmabak anga khelh chhunzawm a nih tur thu an ziak tel bawk.

Cricket Inelna
Cricket Association of Mizoram hnuaiah 1st Division Mahuma Memorial Tournament leh 2nd Division Khaled Memorial Tournament khelh mek a ni a, sorkar thuchhuah thar avangin CAM-in inkhelh hun an sawn.