Sania Mirza tan Australian Open a tawp

Tennis season tawp ruala chawlh a tum thu sawi tawh Sania Mirza chu Australian Open aṭangin a tla fel. Thawhlehni zan khan Mirza leh a ṭanpui Rajeev Ram te chu mixed doubles quarterfinal aṭanga vuak tlak an ni.

Indian tennis star te hi tualchhung player Jaimee Fourlis leh Jason Kubler te ṭangdun lakah 6-4, 7-6 (7-5) in an chak lo. Mirza hi women's doubles lamah a tla tawh bawk a, a tan Australian Open 2022 chu a tawp fel.

Kum 35 mi Mirza hi Indian hmeichhe tennis player zinga hlawhtling ber a ni. Grand Slam title chauh pawh paruk a la, heng zingah hian mixed doubles bika a lak pathum a tel, a sulhnu hi sawi nep theih a ni lo.

Mirza te an tlak takah chuan, season khat chhunga Grand Slam hmasa ber Australian Open bikah chuan Indian player dam an awm tawh lo. May thlaa khelh tur French Open nghah a ngai leh rih tawh dawn.

Women's doubles aṭanga an tlak hlimah Mirza hian, "Ka tan season hnuhnung ber a ni tawh ang, tunah chuan kar tin mai hi a mal te tein ka chhiar chho tawh ang. Ka chawl dawn tih ka sawi chiang vek thei lo, mahse chawlh ka duh," tiin a lo sawi tawh.

Singles lamah hlawhtling vak lo mah se doubles-ah chuan Mirza hi a hlawhtling hle. Martina Hingis nen an inkawp fuh lai phei chuan hun rei tak chhung world number 1 an ni a, major title pawh an vaw chhuak hnem hle.