AFCON: A changtupa chu Mane

Liverpool forward Sadio Mane chuan Africa Cup of Nations quarterfinal-ah Senegal a hruai thleng a, Thawhlehni zan khan last 16 inkhelah Cape Verde chu 2-0 in an hneh.

Mane hi Cape Verde keeper Vozinha nen ball an inchuhna lamah a chesual a, lu hai vangin a talbuai hman - mahse, a hnuah goal a khung a, Bamba Dieng chuan goal khat belhchhah bawkin a thiam pariat zingah an tel.

Cape Verde erawh an mamawh zawk goal aiin red card an hmu a, first half-ah midfielder Patrick Andrade chu hnawhchhuah a ni a, minute 57-naah keeper Vozinha hnawhchhuah a ni bawk.

Thawhlehni zana last 16 inkhel dangah Morocco chuan 2-1 in Malawi an hneh a, rin loh zawk Malawi tan hian Gabadinho Mhango chuan goal hmahruai khung mah se Morocco tan Youssef En-Nesyri leh Achraf Hakimi ten an chhanglet a ni.

Mane a tlu
Senegal-in last 16 lut mah se group stage-a an khelh danah beisei an phak lo a, point li nena last 16 lut Cape Verde lakah pawh chak chiang saa dah an harsa hle.

Minute 21-na lekah Cape Verde midfielder Andrade chu Senegal player Pape Gueye lakah hlauhawm takin a che a, red card pek zui a ni - team ṭha lo zawkin a tlem zawk ni chunga hun tam zawk an khelh a ngai.

Senegal-in heti chung hian goal an khung lawk thei lo a, minute 53-naah thil duhawm lo a thleng. Senegal keeper Edouard Mendy ball pet thui tak chu Mane-a'n chan hman tumin a um a, Cape Verde keeper Vozinha a lo tlan chhuak ve bawk.

Player pahnih an intauh a, khelmualah lu haiin an tlu - Vozinha hi a chet dan hlauhawm tak chu video assistant referee hmanga ennawn a ni a, hnawhchhuah a ni. Mane pawhin ngai a awh lo tih a chiang a, Senegal lamin an la chhuak lo chu thilmak a tling.

Mane a tho e!
Senegal-in an player chhuanvawr Mane an la chhuak duh lo a, Liverpool forward hian an lakchhuah loh chhan a pholang zui - minute 63-naah goal hmahruai a khung a, Senegal tan beiseina a siamsak.

Mane hi khelhtir reng chi a ni lo tih a lang a, minute 70-naah Dieng chuan a thlak. Mane thlaktu striker hian hun pek belh minute hnihnaah chak nemnghehna goal a khung zui a, player pakuaa khel Cape Verde tan beisei a bo.

Senegal manager Aliou Cisse chuan, "Mane kha a lu a hai a, engmah hre lo ang maia a awm hman avangin damdawi in panpui a ni," a ti a, a forward chu a rang lama enkawlna pek a nih thu a sawi.

Mane hian inkhelh zawhah instagram lamah damdawi ina Vozinha nena an thlalak a pholang ve bawk a, Liverpool forward hian engkim a ṭhat vek thu a ziak tel bawk.

Morocco an chak
Player hming en mai chuan Malawi chu awlsam taka tlawm tura ngaih an ni a, mahse, lehkhaa inziak leh a tak ram a dang - minute sarihna lekah South African club Orlando Pirates tana khel Mhango chuan Malawi tan goal hmahruai a khung a, 1-0 a ni der.

Mahse, Morocco-in team ṭha zawk an ni tih an inhria a, inkhel an thunun zui. Sofiane Boufal leh En-Nesyri ten chance hlauhawm an nei a, Wolves defender Romain Saiss chuan hnai set sawt aṭangin bar a tih per bawk.

Malawi tan goalkeeper Charles Thomu a che ṭha takzet - mahse, first half hun pek belh minute hnihnaah Sevilla striker chhuanvawr En-Nesyri-a ball tauh ṭha zet erawh a dang zo lo a, 1-1 in chawlhlawk hman a ni.

Morocco-in second half-ah bul an ṭan ṭha a, Malawi defender Dennis Chembezi-a'n a kuta ball a tawh fuh avangin penalty beisei mah se VAR hmanga ennawn a nih hnuah pawmsak an ni lo - mahse, minute 70-naah Hakimi chuan freekick hmangin goal mawi zet a khung a, 2-1 a chakin a thiam pariat zingah Morocco an tel.