Vawiinah Mizoram cricket team chhuak dawn

Cricket Association of Mizoram tirh Mizoram team chuan Vijay Hazare Trophy hmachhawn turin vawiin hian Aizawl an chhuahsan dawn.

Mizoram team hian bus-in Silchar an pan ang a, heta ṭang hian flight-in inelna neihna hmun tur Gujarat an pan ang. Mizoram hi Plate Group-ah Arunachal Pradesh, Bihar, Manipur, Meghalaya, Nagaland, Puducherry, Sikkim leh Uttarakhand te nen an awm khawm a. September 19 hian an match hmasa berah Arunachal Pradesh an hmachhawn ang.

Mizoram team-ah hian tualchhung player 12 bakah professional player Taruwar Kohli, Sinan Khader leh Akhil Lalchand Rajput te an awm. Tualchhung player zinga tawnhriat nei ṭha ber K. Vanlalruata chu captain atan ruat a ni.

BCCI-in coach atan Mzioram hi Ranji Trophy-a Karnataka coach hlui P. V. Shashikanth an pe a, Mizo tlangval Lalruatsanga Vanchhawng chu assistant coach a ni. Support staff dang te chu Subhash Pawar (trainer), Karan Nayar (physio) leh Lalroṭhuama (manager) te an ni.