Chhinga Veng leh Sanga hmaah BVT
Mizoram Premier League-ah champion zawn thei an la awm lo a, tualchhung football-a thil harsa hi Lalsangzuala Hmar kaihhruai Chhinga Vengin an thei ang em tih hi zawhna chhan har tak a ni.
Chhingcows hian zanin dar 7:00 hian Lammualah Bethlehem Vengthlang FC an hmachhawn dawn a, anni hian an match hmasa berah kai thar Chawnpui FC 1-0 in an hneh tawh a. BVT erawhin Mizoram Police 1-0 a hneh loin bul an ṭan thung.
BVT dahsangtu Sanga
Chhinga Veng coach Sanga'n BVT a enkawl tawh a, hemi hma hian Chanmari FC-ah assistant coach hna chelh reng tawh mah se tuna a hmachhawn tur club hi head coach hna a chelh ṭanna tak takah a ngaih theih.
Sanga hian kum 2015 khan BVT enkawlin Spanish coach Manuel Retamero kaihhruai Aizawl FC chu hnehin nomawi a chawipui a, season khat lek a awm hnuah a inzir chhuahna Chanmari FC coach ni turin an la let.
Chhinga Veng boss Sanga chuan, "BVT hi ka hrechiang a, anni chuan hlauh an nei lo. Jersey an hak tawh hi chuan eng team pawh hmachhawn se huaisen takin an khel tawp a, an khingpui te kha I League club an nih leh ni loh lamah an buai lo," tiin a club hlui a fak.
An khelh dan hmang sawi zuiin Sanga chuan, "An match hmasa bera Mizoram Police an hneh loh ṭum khan bul an ṭan ṭha zawk a, an khingpui ai khan a letin an tam zawk. Keini pawh anni ang bawka kan tlan tam lo a nih chuan chak lo thei kan ni," tiin Vanglaini a hrilh.
Chhinga Veng ṭha zawk
Champion lai Chhinga Veng hian match hmasa berah goal khat chauh an khung a, BVT nen erawh an player pawimawh MS Dawngliana'n bul a ṭan tawh dawn a, an hlauhawm sawt ang.
Sanga chuan, "Midfield kan thuam ṭhat a ṭul a, Dawngtea a chhawr theih tawh avangin Romawia pawh midfield-a pawh let ngam a ni tawh a, Jacob-a kan nei bawk a, kan khel pawh a nung sawt turah ka ngai," tiin match hmasa ber aia an ṭhat tawh thu a sawi.
Chhinga Veng hian Sanga hnuaiah record duhawm tak an nei a, MFA Super Cup leh I Day Football an champion ve ve tawh a, tuna an hmabak chu Mizoram Premier League champion nawn chiah a ni ta.
BVT an inringtawk
Bethlehem Vengthlang FC-in coach atan MPL best defender pawh ni tawh H. Lalhlimpuia an hmang a, Lunglei tlangval hi defender ni mah se a naute chu attacking football khel turin a duh.
Hlima chuan, "Chhinga Veng an nih avanga kan nawr ngam lohna chhan tur a awm lo a, anni nen hian friendly match ṭum hnih kan khelh tawhah pawh chak loh kan nei lo. Ka player-te inkhel turin an inpeih a, tawnhriat an nei tam tawk lo deuh tih lo chu an rilru put hmang leh an thawhrimna kawngah sawisel tur ka hre lo," tiin Vanglaini a hrilh.
BVT squad-ah Hlima hi a inziak lut tho a, inhliam vangin match hmasa ber squad-ah a tel lo. Hemi chungchang hi sawiin BVT coach chuan, "Kei pawhin dam lam ka hnaih tawh a, Chhinga Veng nen pawh hian squad-ah ka awm tawh ang. Bul erawh ka la ṭan thei lo," tiin mamawh dan a zira lut thei tura a inpeih thu a sawi.