Canelo leh Golovkin ten Los Angeles thleng

Pathianni zing khian tunlai khawvela fighter hmuhnawm ber pawla chhal Canelo Alvarez leh Gennady Golovkin te an inhmachhawn dawn a, fighter pahnih hian an inhmachhawnna tur hmun Los Angeles an thleng tawh.

September 2017 khan fighter pahnih hi an lo inhmachhawn tawh a, inhnek thlirtute lawm loh zawng takin chak zawk awm loa puan a ni a, T-Mobile Arena-ah intawng leh turin ruahmanna siam a ni ta a ni.

'GGG' tia hminglem an pek Golovkin hi WBA (Super), WBC leh IBO middleweight champion lai niin a kawnghren kawl lai te hi Mexican boxer nena inchuh turin a chhawp chhuak ang.

Kum 36 mi Kazakhstani boxer Golovkin hian fight vawi 39 a hmachhawn tawhah a la tlawm miah lo a, heng a khingpui zinga 34 ngawt chu a knockout bawk.

A hmaa ding tur, kum 28 mi Canelo hian vawi 52 ngawt fight hmachhawn tawhin vawi khat chiah a la tlawm a, fighter hmuhnawm ber pawla chhal niin GGG nena an inhnek tur hian ngaihven a hlawh hle.