Kum hnih chhung atan Werdum hrem

UFC heavyweight champion hlui Fabricio Werdum chu a zun 'test'-naah damdawi hman phal loh a hmang tih hmuhchhuah a ni a, kum hnih chhung fight hmachhawn thei lo tura hrem a ni.

Kum 41 mi fighter hrem a nih­na hi April-a a zun test-na aṭangin hman phal loh zinga mi intih­chakna damdawi a hmang tih hmuhchhuah a ni a, US Anti-Doping Agency (USADA) chuan May 22-a provi­sio­nal suspension pek a nih aṭang khan hrem a nihna hi an chhiar ṭan tur thu an sawi.

Werdum hi ruahman ang chuan tun Inrinnia Moscow-a UFC Fight Night-a inlan tura tih a ni a, Aleksei Oleinik nena inhmachhawn tura tih niin mipui pawhin an nghakhlel hle.

Mahse, beisei anga thil a kal tak lohah chuan Brazilian fighter aiah hian New Zealander Mark Hunt chu a ding dawn a ni.

Vawi 32 fight a hmachhawn tawha vawi 23 hnehna chang thei fighter hian a vanglai hun tak taka chhiar theih chu 2012-15 chhung khan a tawng a, Cain Velasquez hneha UFC heavyweight champion niin match ruk ngawt a zawnin a chak.

Werdrum hian he kum thum hun chhung hian fighter langsar tak tak Hunt, Antonio Rodrigo Nogueira, Travis Browne, Mike Russow leh Roy Nelson te a hneh vek a ni.