World Cup finalist Croatia an mualpho Spain-in goal ruk khung nan an hmang!

Rin loh taka World Cup final an luh avangin Croatia-in fak an hlawh a, mahse Russia aṭanga an haw hnuah erawh an chak leh tawh lo!

Croatia hian Cristiano Ronaldo tel loa khel Portugal chu friendly match-ah 1-1 in an inhnehtawkpui tawh a, Thawhlehni zan khan Spain nen UEFA Nations League-ah inhmachhawnin 6-0 ngawtin an tlawm!

Spain tan Saul Niguez, Marco Asensio, Rodrigo, Sergio Ramos leh Isco ten goal khat ṭheuh an khung a, Croatia keeper Lovre Kalinic chuan an lamah a ti lut bawk - Croatia-in an ram football team chanchina goal ruk an chhuah hmasak ber a ni.

Team inang lo

World Cup-ah chuan Croatia-in final an lut a, Spain-in inelna thlengtu Russia ngam loin last 16-ah World Cup an mangṭha thung. World Cup hnua international break hmasa berah erawh team pahnih an danglam ta.

Croatia-in Portugal an inhnehtawkpui laiin Spain-in World Cup semifinal lut England chu Wembley-ah ngei an hneh a, coach thar Luis Enrique hoin an phur vanglai tak a ni - an inkhelah hmuh theihin a lang.

Inkhel ṭantir lam chu Croatia hian thunun ve bawk mah se minute 24-naah Spain-in Saul Niguez hmangin goal hmahruai an rawn khung a, a bak zawng hi chu Spain ta a ni tawh.

Asensio 'hun'

Spain-in goal an khung aṭangin minute kua a liam hman chauh a, Marco Asensio hun a inher chhuak ve thung. Real Madrid player duhawm hian a thiam 'danin' yard 20 vela hla aṭangin Spain goal hnihna hi a khung.

Kum 22 mi attacking midfielder a phur tawlh tawlh a, goal hmahruai a khung aṭangin minute hnih a liam hman chauh tihah goal dang a thawk chhuak lehnghal - pet goal tuma a shot neih chuan bar a per a, ball kal zelin Croatia keeper Lovre Kalinic perin a lut daih!

Spain tan Rodrigo, Ramos leh Isco ten goal khat ṭheuh an thawh ve leh bawk a, Croatia an mualpho - Rodrigo hian Enrique hnuaiah inkhel bul a la ṭan ve ve a, goal a khung ve ve bawk.

Chhuanlam...

Spain lakah Croatia an mualpho a, chhuanlam tur an zawng a nih chuan chhuanlam tur an nei - World Cup final-a France laka starting XI aṭang khan player pali chiahin Spain hi an hmachhawn.

Defender Domagoj Vida, midfielder Luka Modric, Ivan Rakitic leh Ivan Perisic-te chu France hmachhawntu, Spain hmachhawn leh awmchhun an ni a, World Cup hnua indinthar leh mek team hi an la insiam ṭha hman lo.

Russia-a final an luh nana player pawimawh tak Danijel Subasic chuan ram tana inkhelh a chawlhsan tawh a, tlarhmaa an in chhuanna Mario Mandzukic pawhin Croatia jersey a hlip tawh. Tlarhnung lamah Vida nena inkawp fuh em em Dejan Lovren chu hliam vangin chhawr theih a la ni lo bawk.

Mahse maw...

Croatia tan chhuanlam tur ṭha tak tak a awm rual hian Spain hi World Cup hunlaia an ṭhat dan ang berin an khel bik lo. Andres Iniesta chuan Spain tana inkhelh a chawlhsan a, Manchester City midfielder pawimawh David Silva leh Barcelona defender Gerard Pique Spain jersey a hlip tawh bawk.

Tun hnaia Spain-in striker an neih hriam bera chhal ngam Diego Costa chu koh ni mah se Brazil-a piang striker hian mimal thil avangin ram tana inlan rih loh a thlang a, tlarhmaa Spain duhthlan tur neih Rodrigo leh Iago Aspas te hi striker 'class' tia sawi tur em chu an la ni lo.

A tawi zawnga sawi erawh chuan World Cup zawhah Croatia leh Spain-in an player chawl ṭhenkhat avangin team thar an din chho mek ve ve a, Spain an insiamrem rang zawk.

Enrique harhna

Spain-in World Cup dawnah chawpchilh taka Julen Lopetegui an ban thu kha sawi nawn a ngai leh ṭhin. Real Madrid coach ni ta hian Spanish FA hriatpuina tel loin Real hi inremna a neihpui a, an duh aia hmaa an puanzar bawk avangin ban a ni.

La Roja sporting director nilai Fernando Hierro chu manager lailawk atan ruat a ni a, last 16 a thlenpui. Ram dang tan chuan World Cup khelh ringawt pawh result ṭha a nih laiin Spain tan a ni ve lo. Hierro a chawl zui a, Enrique a lo lut.

Kum 48 mi manager hi Barcelona a enkawl laia a season hmasa bera treble champion ni nghal thei a ni a, Spain-ah pawh insiamrem turin hun a duh tam lo. Enrique hnuaiah Spain an phur sawt a, player an thatho a, an inkhel a hmuhnawm hle - hma an la sawn dawn chauh niin a lang.

Player inlan

Spain (4-3-3): De Gea; Carvajal (Azpilicueta 75), Nacho, Ramos, Gaya; Ceballos, Busquets (Rodri (59), Saul (Alcantara 65); Asensio, Rodrigo, Isco

Goals: Saul 24, Asensio 33 Kalinic OG 35, Rodrigo 49, Ramos 57, Isco 70

Croatia (4-2-3-1): Kalinic; Vrsalijko (Rog 20), Mitrovic, Vida, Pivaric; Rakitic, Brozovic (Pjaca 62); Kovacic, Modric, Perisic; Santini (Livaja 71)