Liberia tan President a khel!

Liberia president George Weah chuan an ram tan international friendly match-a khel a, an khawpui Monrovia-ah Nigeria lakah 2-1 in an tlawm.

African player zinga FIFA Player of the Year hmasa ber ni thei Weah hian ram tan a khelh laiin jersey number 14 a ha ṭhin a, hei hi Liberian FA chuan tuma hak tawh loh turin an dah ṭha dawn.

Hemi a nih avang hian Weah pawh hi kum 51 mi lai ni tawh mah se Liberia tan hian a inlan leh a, minute 79 chhung khelmualah hun a la hmang thei a, lakchhuah a nih laiin fan-ten ding chungin zahna an lantir.

Weah hian player a nih laiin Paris Saint-Germain leh AC Milan tan pawh a lo khel tawh a, ram tan match 61-ah goal 22 khungin kum 1995 khan Ballon d'Or leh FIFA Player of the Year chawimawina a dawng kawp thei a ni.

Nigeria tan hian Galatasaray forward Henry Onyekuru leh Serie B club Crotone striker Simeon Nwankwo ten goal khat ve ve an khung a, Liberia tan Kpah Sherman chuan a sut ve bawk.

Super Eagles hian squad chhah tak Liberia lakah hian an hruai a, Leicester City midfielder Wilfred Ndidi leh striker Kelechi Iheanacho te pawh an inlan.