England an chak ve leh ta

England-in World Cup quarterfinal-a an chak hnua a vawi khat nan hnehna an chang ve ta a, Thawhlehni zan friendly match-ah Switzerland 1-0 in an hneh. Amaherawhchu an chakna hi friendly match an ni a, inkhel pawimawh UEFA Nations League match hmasa berah erawh Spain hneh loin bul an ṭan.

Leicester City khelmual King Power Stadium-a inkhelah England tan Marcus Rashford chuan he inkhela goal awmchhun hi a khung a, UEFA Nations League-a 6-0 a Iceland sawptu team hian a chhanletna tur an nei thei lo.

Khel ṭha Swiss

Inkhel ṭantir lama ti ṭha zawk chu Switzerland an ni a, goal khungna chance pawh an nei hmasa zawk. England goalkeeper Jack Butland chetsual zarzoin Xherdan Shaqiri chuan hun ṭha a nei a, mah se Liverpool forward hian a chance neih hi post tih per nan a hmang.

Chawlhlawk hman a nih hnuah England an insiamṭha a, Kyle Walker ball siamsak chu Rashford chuan minute 54-naah an goal neihchhun ni turin a khung a, ram tana a khelh ṭhat a chhunzawm zel.

Mi danglam Rashford

Marcus Rashford-a'n beisei angin season bul a ṭan lo a, league match hmasa bera Leicester City laka bul a ṭan tih loh chu Manchester United tan inkhel bul a ṭan leh tawh lo a, khelmualah minute 122 chiah hun hmangin a match hnuhnung berah Burnley lakah hnawhchhuah a ni.

Mahse, England tan erawh kum 20 mi forward hian puitlin lam a pan tih a pholang a, ram tan innghahna tlak a nihzia a pholang nawn. Switzerland laka goal a khung hma hian Spain lakah a khung tawh bawk a, goal a khung piah lamah a khel ṭha em em bawk.